Kryeministri i Kosovës, Hashim Thaçi e ka konfirmuar kabinetin e tij qeveritar për përgatitjet që po bëhen për t'u përballur me Beogradin në Asamblenë e Përgjithshme të OKB-së, ku Serbia ka proceduar një projektrezolutë, me anë të së cilës kërkon negociata të reja për statusin e Kosovës.

"Jam më se i bindur se do të dalim fitimtarë edhe në Asamblenë e Përgjithshme të OKB-së ashtu sikurse kemi dalë fitimtarë në Gjykatën Ndërkombëtare të Drejtësisë, e cila muajin e kaluar e bëri të qartë se Deklarata e Pavarësisë së Kosovës nuk bie ndesh me të drejtën ndërkombëtare", ka thënë Thaçi.

Ai ka thënë se javën që vjen delegacioni shtetëror do të udhëtojë për në Nju Jork, ku do të zhvillojë edhe takime e aktivitete të shumtë në funksion të njohjes së pavarësisë së Kosovës. Në përbërje të delegacionit do të jenë: Presidenti i Kosovës, Fatmir Sejdiu, kryeministri Hashim Thaçi, dhe ministri i Punëve të Jashtme, Skender Hyseni.