28. 02. 2018. 18:09   >>  18:08 0

DJECA I SNIJEG

Put bijelih oblaka

Nakon Vječnog grada i Podgorica napokon dočekala snijeg. Koliko smo ga prizivali i dozivali, morao je jednom pasti.

Gledalo se danima u nebo i vremensku prognozu, kao da nam od toga život zavisi.

Noćima se nije spavalo, ili tek na jedno oko. čekali veliki da iznenade male bajkovitim prizorom. Obećali roditelji djeci Snješka za kraj februara i zimovanje. I penzionari bezecovali isto, kao pozni novogodišnji poklon svojim najmlađim potomcima. Konačno, odrasli ovoga puta nijesu omanuli, makar što se snijega tiče, a ostalo će djeca oprostiti.

Na samom početku bijaše čupavo. Izgledalo je da neko tamo gore tek trese dobro sašiven perjani jastuk...Nakon obavezne drame, konačno se raspara davno zašiveno, željeno i dugo iščekivano.

Ono što je na početku samo trunilo i sipilo, poče ozbiljno da pada u svoj toj ljepoti. Probudi snijeg u Glavnom gradu ne samo najmlađe, već i djecu u ljudima.

Došlo vrijeme da i Podgorica sniježno zablista u sivilu svakonevice. Makar na kratko, sve je bilo nježno, čisto, lijepo i bajkovito. Kada bi još Nova godina odnekud stigla za koji dan, bilo bi nam sve potaman.

U ime djece ovog grada i onih koji se tako osjećaju, hvala ti sniježni oblače. Jer, Rim, Kolašin, i Žabljak su mnogima daleko, iako svi putevi tamo vode.

Mladen Đuretić