ISTRAŽIVANJE

Kako se odreći cigarete

Nakon dugotrajnog proučavanja, istraživanja i analiziranja britanski ljekari došli do zaključka da neki ljudi jednostavno ne mogu da prestanu da puše. Njima se savjetuje da barem smanje broj popušenih cigareta na dan, ako žele da sačuvaju zdravlje.

Ali, strastvenim pušačima nije jednostavno ni da smanje broj cigareta. Njima je, kažu stručnjaci, potrebna pomoć ljekara i drugih stručnjaka koji će ih usmjeravati i podsticati na postepeno smanjivanje nezdrave navike. Nije loše pronaći i alternativnu metodu koja će funkcionisati za njih. Primjera radi,  neki drastično smanje pušenje nakon što nabave elektronsku cigaretu ili pak koriste žvakaće gume s nikotinom.

"Ljudi puše zbog nikotina, ali umiru zbog katrana koji se takođe nalazi u cigaretama. Pušenje je veoma zavisna aktivnost, a neki ljudi skloniji su zavisnostima. Upravo zbog toga za njih je gotovo nemoguće odreći se te ružne i nezdrave navike", istakao je profesor Majk Keli iz britanskog Centra za javno zdravlje. 

Osim što je nezdravo, pušenje je prilično skupo i ubrzava starenje. Iako su toga svjesni, neki pušači ipak se ne mogu odreći cigarete.

Možda prihvate savjet o smanjivanju pušenja uz neke uređaje ili preparate koji im u tome mogu pomoći. Nedavno je jedno istraživanje pokazalo da ljudi koji se prebace na elektronsku cigaretu lakše trajno prestanu pušiti, a vremenom se onda odreknu i elektronske cigarete.