NA IVICI INCIDENTA

Varnice između mještana i Golubovića

Grupa mještana sela Lužac osujetila je juče navodnu namjeru lokalnih vlasti da na jednoj lokaciji pored rijeke Bistrice, u blizini njihovih kuća, odlože nagomilani otpad sa gradskih ulica.

Mještani su dan ranije zatekli mašine kako na tom mjestu kopaju veliku rupu, dubine desetak metara, kojom je čak ugrožen i vodotok Bistrice, pišu Vijesti.

Oni su poslije toga postavili straže, a zatim preko noći parkirali i ostavili desetak privatnih automobila oko rupe, da kamioni sa otpadom ne bi eventualno mogli da priđu.

"Ujutru smo odmah došli na to mjesto i nastavili da stražarimo. Zvali smo i vodoprivrednog inspektora, koji je rekao da će zatražiti da se rupa zatrpa i lokacija vrati u prvobitno stanje", ispričao je jedan od mještana Lušca koji nije želio da mu se pominje ime.

On je kazao da je u jednom trenutku naišao gradonačelnik Berana Vuka Golubović, koji nedaleko odatle ima vikendicu i da je došlo do verbalnog duela, u kojem su razmijenjene teške riječi.

„Ne znam da li je on naišao slučajno, ali se namjestilo da dođe baš kada je bila najveća gužva i rasprava. Razmijenjene su teške riječi. Neki od mještana izrazili su želju da se fer potuku sa predsjednikom Opštine, ali je on poslije tog incidenta ušao u automobil i otišao", rekao je taj mještanin sela Lužac.

Vijest o incidentu ubrzo je „krenula" da kruži, pa je poprimala različire verzije. U jednoj od tih verzija pričalo se kako su se gradonačelnik i taj mještanin navodno i bukvalno potukli, pa čak i da je „pala krv".

„Ne, nije bilo tuče. Ali je bilo vrlo neprijatnih riječi. Istina je da je malo falilo da bude i tuče... Iz lokalne uprave su tvrdili da rupa nije iskopana zbog smeća. Šta god da je bila namjera, nas to ne zanima, samo tražimo da se mjesto uredi onako kako je bilo. A smeće ovdje naravno da ne mogu odlagati", rekao je taj mještanin.

U Beranama već četvrti mjesec traje blokada gradskog smetlišta na Vasovim vodama, gdje mještani prigradskog naselja Berasnelo blokiraju dalje odlaganje otpada na ovoj lokaciji, gdje su lokalne vlasti namjeravale da grade čak i regionalnu deponiju.