01. 12. 2020. 11:18   >>  11:20 0

ZAVRŠENA AKCIJA

Iz korita rijeke Ribnice uklonjeno 110 vreća otpada

Radnici gradske Čistoće uspješno su završili akciju uklanjanja otpada sa obala i iz korita rijeke Ribnice. Naglasili su da je uklonjeno 110 vreća raznog komunalnog otpada i da je potpuno očišćen potez od Brijega Ćukovića do Doma zdravlja Nova Varoš.

Radnici gradske Čistoće, iako otežano u ovom periodu godine, prehodna tri dana uklanjali su otpad sa obala i iz korita rijeke Ribnice. 

''Sa navedenog prostora je tokom akcije, uklonjeno 110 vreća raznog komunalnog otpada, kao i određena količina kabastog otpada, ostaci starog namještaja, drvnog otpada i slično, a pored ovih poslova, ekipe Čistoće su uklanjale lišće sa šetališta od mosta Kapadžića do knjižare Karver, prostora oko knjižare, kao i prostora Sastavaka'', navode iz Čistoće.

Kažu da korito rijeke Ribnice i pored naših brojnih apela i velikog broja akcija čišćenja, i dalje nesavjesnim pojedincima služi za odlaganje raznih vrsta otpada.

''Podsjetićemo da smo, sa ciljem da se spriječi prodiranje otpada ka obali Morače – Sastavcima, u prethodnom periodu postavili dvije zaštitne barijere – ispod Tabačkog i ispod mosta Kapadžića'', poručuju u saopštenju.

Namjera im je, kažu, da svim ovim radnjama podstaknu promjene nesavjesnog ponašanja pojedinaca, uz još jedan apel da, odlaganjem otpada na za to predviđena mjesta, zajedno možemo sačuvati i ljepotu naših rijeka.