PREDSJEDNIČKA OVLAŠĆENJA

Danas referendum u Azerbejdžanu

U Azerbejdžanu se danas održava referendum o predloženim izmjenama ustava kojim se šire ovlašćenja predsjednika Ilhama Alijeva i produžava predsjednički mandat, što je naišlo na osude opozicije i grupa za odbranu ljudskih prava.

Prema ustavnim amandmanima koje je već odobrio Ustavni sud zemlje, predsjednički mandat treba da se produži na sedam godina u odnosu na sadašnjih pet i da se uvedu mjesta prvog potpredsjednika i potpredsjednika.

Opozicione grupe organizovale su proteste prije održavanja referenduma osuđujući pokušaje predsjednika Alijeva da zadrži kontrolu svoje porodice u toj bivšoj sovjetskoj republici na Kavkazu, bogatoj naftom.Predloženi amandmani duboko remete ravnotežu vlasti dajući ovlašćenja bez presedana Ilhamu Alijevu, upozorila je Venecijanska komisija, savjetodavno tijelo Savjeta Evrope.

Organizacija za odbranu ljudskih prava Amnesti Internešenel je ocijenila da će amandmani dovesti do kršenja slobode pridruživanja i osudila je hapšenja i zastrašivanja koja su pratila kampanju za referendum.Ako na referendumu pobijedi opcija koja prihvata ustavne promjene prvi potpredsjednik postaće druga najvažnija funkcija u državi umjesto dosadašnje funkcije premijera.Predsjednik će takođe moći, prema predloženim promjenama, po svom nahođenju da raspusti parlament i sazove prijevremene izbore.

Ilham Alijev, 54, čvrstom rukom vlada Azerbejdžanom od 2003. godine kada je umro njegov otac Hajdar Alijev koji je i sam bio na čelu zemlje od 1993. godine. Alijev može da ima neograničen broj predsjedničkih mandata od kada je spornim referendumom 2009. godine ukinuto ograničenje od dva uzastopna presjednička mandata za jednog kandidata.