[ Beta, Objavila: R.B. ]

BORBA SA VATROM

Ugašeni požari u blizini Černobilja

Ukrajinski zvaničnici za vanredne situacije su objavili da su uspjeli da ugase šumske požare u području zagađenom radijacijom u blizini zatvorene nuklearne elektrane u Černobilju.

Stotine vatrogasaca uz podršku aviona posljednjih 10 dana borilo se protiv nekoliko šumskih požara oko Černobilja. Obuzdali su početne požare, ali izbili su novi bliže nekadašnjem nuklearnom postrojenju.

Šef službe za vanredne situacije Mikola Čečekin izvijestio je predsjednika Volodimira Zelenskog da je kiša pomogla vatrogascima da ugase plamen, ali je priznao da će trebati još nekoliko dana da se ugasi trava koja tinja.

Čečetkin je rekao da je osoblje za vanredne situacije spriječilo da požar zahvati deponije radioaktivnog otpada i druge objekte u Černobilju.

Požari u tom području su česti i obično počinju kada stanovnici u rano proljeće pale suvu travu što je široko rasprostranjena praksa u Ukrajini, Rusiji i nekim drugim bivšim sovjetskim državama, a to često dovodi do razornih šumskih požara.