Ditari 15.07.2025

Ditarin e përgatiti, Violeta Gjokaj

INSPEKTORATI SHQIPTOI GJOBA NË VLERË RRETH 40 MIJË EURO

Inspektorati ka shqiptuar gjoba në vlerë gati 40 mijë euro gjatë dy ditëve të fundit. Numri më i madh i kallëzimeve ka të bëjë më punën gjatë festave, thotë Marina Jankoviq nga Inspektorat i Tregut. Po ashtu, inspektoret në terren po hasin tregëtar të paregjistruar, punë në të zezë, si dhe mosdhënie të kuponëve fiskalë.

FILLOJNË KONTROLLET E PUSHIMEVE MJEKËSORE TË PUNONJËSVE NË KRYEQYTET

Arsyetueshmëria e pushimit mjekësor për punonjësit në administratën e kryeqytetit do të rishikohet, njoftoi në një deklaratë për Portalin e RTMZ nënkryetari i Komunës së Podgoricës, Boris Spalleviq. Ai tha se po ndërmarrin kontrolle më intensive për pushimet mjekësore të punonjësve dhe se po nisin një fushatë së bashku me institucionet dhe komisionet kompetente për t'u marrë me të ashtuquajturat pushimet mjekësore të rreme.

“Është karakteristike që ky fenomen është veçanërisht i pranishëm pas ndryshimit të qeverisë në Podgoricë në vitin 2023. Institucionet kompetente dhe komisionet mjekësore do të përfshihen në fushatën për të luftuar abuzimin me pushimin mjekësor, me qëllim parandalimin e abuzimit të mundshëm me pushim mjekësor dhe forcimin e sistemit të shëndetit publik, përmirësimin e punës dhe funksionalitetit të administratës së qytetit, në dobi të qytetarëve, ekonomisë dhe shtetit”, është kategorik Spalleviq.

“Veprimi në kundërshtim me dispozitat e përmendura është abuzim i pushimit mjekësor dhe do të sanksionohet, dhe ne presim që kontrolli i pajtueshmërisë me këto norma ligjore, përveç masave të tjera të kontrollit, do të jetë i vlefshëm në procesin e zvogëlimit të numrit të mungesave nga puna”, tha Spalleviq.

NJË SHTETAS TURK U ARRESTUA PËR RRËMBIM, TRE TË TJERË JANË NË KËRKIM

Policia e Podgoricës arrestoi shtetasin turk F.K. (25), ndërsa tre të tjerë janë në kërkim me dyshimin për privim të paligjshëm nga liria të dy bashkatdhetarëve të tyre, njoftoi Administrata e Policisë.

Policia tha se dy shtetas turq raportuan se disa persona, kundër vullnetit të tyre, i çuan në një vend të panjohur, ku u ndaluan, u lidhën dhe u keqtrajtuan fizikisht.

"Shtetasi turk E.C. (23) raportoi në polici se A.O.A. (25), me të cilin ai ishte i punësuar duke redaktuar një faqe interneti bastesh sportive, dhe tre persona të tjerë të panjohur e futën me forcë në një automjet me targa të panjohura në lagjen Siti kvart ", thuhet në deklaratë.

Thuhet se E.C. raportoi se më pas shkuan te shoku i tij T.E. (23) në të njëjtën lagje dhe e futën në automjet në të njëjtën mënyrë, pas së cilës ata udhëtuan jashtë qytetit në një vilë në një adresë të panjohur.

Policia tha se E.C. dhe T.E. arritën të ikin dhe se, me ndihmën e kalimtarëve, ata thirrën policinë.

NJË PERSON NGA KOSOVA ËSHTË ARRESTUAR NË PIKËN KUFITARE SUKOBIN

I.Z. nga Kosova është arrestuar në pikën kufitare Sukobin pasi gjatë kontrollit të automjetit që drejtonte është gjetur hashash. Gjykatësi për kundërvajtje i shqiptoi një gjobë prej 1.200 eurosh, pas së cilës inspektori për të huaj mori vendim për dëbimin e tij nga Mali i Zi, njoftoi Drejtoria e Policisë.

Policia bëri të ditur se oficerët e Stacionit të Policisë Kufitare në Ulqin, në hyrje të Malit të Zi, në pikën kufitare Sukobin, kanë kontrolluar një automjet të markës Suzuki që drejtohej nga I.Z. nga Kosova.

U ARRESTUA NJË SHTETAS TË PALESTINËS PËR SHKAK TË DYSHIMIT SE KA KRYER VEPRËN PENALE TË VJEDHJES

Zyrtarët e Sigurisë së Podgoricës kanë arrestuar një shtetas të Palestinës, i cili dyshohet se ka vjedhur një veturë nga një banor i Podgoricës, njoftoi Drejtoria e Policisë.

“Për shkak të dyshimit se ka kryer veprën penale të vjedhjes, është privuar nga liria A.H., shtetas i Palestinës. Ai e ka kryer këtë vepër në mënyrë që, para një supermarketi në lagjen Donja Gorica, ka shfrytëzuar pakujdesinë e pronarit, ka hyrë në një automjet të hapur dhe është larguar në drejtim të panjohur”, thuhet në njoftimin e policisë.

QEVERIA: LIGJ I RI PËR LIRINË E LËVIZJES; OPOZITA: TËRHIQENI PROPOZIMIN

Pasi debati mbi tubimet publike u shty në Kuvend, shumica qeverisëse tha se qëllimi i ligjit të propozuar është të mundësojë lirinë e lëvizjes dhe se ata që janë të pakënaqur mund të protestojnë edhe para institucioneve. Opozita pret që ky akt të tërhiqet nga procedura. Ata gjithashtu theksojnë se kjo është një zgjidhje jokushtetuese që pengon liritë civile.

Debati mbi ndryshimet në ligjin për tubimet publike u shty më herët për shkak të mungesës së propozuesit dhe, siç i tha Radio Malit të Zi shumica qeverisëse, ai duhet të diskutohet pas festave.

Deputeti i PDS-së, Nikolla Rakoçeviq, beson se propozuesi iku nga diskutimi dhe shpreson ta tërheqë atë tekst ligjor nga procedura.

Megjithatë, qeveria nuk mendon kështu. Partia Boshnjake vlerëson se qëllimi i aktit të propozuar është t'u ofrojë qytetarëve lirinë e lëvizjes.

QULLAFIQ - SHARANOVIQ: IMPERATIV PËR PARANDALIMIN E KRIMIT MJEDISOR

Ministri i Ekologjisë, Zhvillimit të Qëndrueshëm dhe Zhvillimit të Veriut, Damjan Qullafiq, u takua me Ministrin e Brendshëm, Danillo Sharanoviq, si dhe me drejtorin e Drejtorisë së Policisë, Llazar Shqepanoviq, me të cilët diskutoi për parandalimin e krimit mjedisor si një kapitull të ri në punën e ministrive përgjegjëse për ekologjinë dhe sigurinë në vend.

U theksua komunikimi i rregullt midis udhëheqjes së Ministrisë së Ekologjisë, Zhvillimit të Qëndrueshëm dhe Zhvillimit të Veriut, Ministrisë së Punëve të Brendshme dhe Drejtorisë së Policisë, si dhe një fokus në të gjitha format e krimit të drejtuara kundër mjedisit, veçanërisht ato forma që ishin relativisht ose plotësisht të pavërejtura për një kohë të gjatë.

"Shfrytëzimi i zhavorrit, prerja e paligjshme dhe neglizhente e pyjeve në veri të Malit të Zi, vjedhja në parqet kombëtare, shkatërrimi i biodiversitetit, sjellja e paskrupullt dhe e paligjshme dhe korrupsioni si një formë e veçantë e eko-krimit prodhojnë pasoja negative të pallogaritshme për mjedisin. Prandaj, lufta kundër krimit mjedisor është e domosdoshme në punë", theksuan bashkëbiseduesit.

DE GROOT: BEI VAZHDON TË NDIHMOJË SISTEMIN ARSIMOR TË MALIT TË ZI

Banka Evropiane e Investimeve siguroi 20.3 milionë euro për sektorin e arsimit në Mal të Zi, falë të cilave shumë shkolla do të rinovohen dhe modernizohen, ndërsa investimet e reja do të inkurajojnë njëkohësisht punësimin e të rinjve dhe qëndrueshmërinë e ekonomisë malazeze, tha Zëvendëspresidenti i BEI-së, Robert de Grot.

Në fillim të korrikut në Luksemburg, De Groot nënshkroi një marrëveshje me vlerë 20.3 milionë euro për përmirësimin e sektorit të arsimit në Mal të Zi me Ministrin e Financave Novic Vukoviq Ministren e Arsimit, Shkencës dhe Inovacionit Angjela Jakshiq Stojanoviq dhe Zëvendësdrejtoreshën Ekzekutive të Zyrës së Kombeve të Bashkuara për Shërbime Projektesh ,Kirstine Damkjaer.

Këto fonde përfshijnë një kredi prej 18 milionë eurosh dhe një grant prej 2.3 milionë eurosh të destinuar për asistencë teknike.

De Groot tha në një intervistë me agjencinë MINA se falë investimeve të reja, infrastruktura dhe kushtet për mësim në 13 institucione arsimore do të përmirësohen.

Ai tha se më shumë se 500 shkolla fillore dhe të mesme në të gjithë Malin e Zi do të marrin pajisje dhe mjete të reja dixhitale për zhvillimin e klasave moderne dhe teknologjikisht të përparuara, ndërsa falë investimeve të reja në dy vitet e ardhshme pritet të zgjerohet kapaciteti me 1.7 mijë vende të reja për nxënësit.

"Gjithashtu, mbi 11,500 nxënës do të jenë në gjendje të studiojnë në kushte të përmirësuara dhe do të krijohen mundësi për të hapur 530 vende pune për mësues me kohë të plotë. Kjo do ta forcojë ndjeshëm sistemin arsimor të vendit", tha De Groot.

CANOVIQ: PLAVA KA NEVOJË PËR ZHVILLIM TË BALANCUAR RAJONAL, ËSHTË LËNË PAS DORE PËR SHUMË KOHË

Rindërtimi i rrugëve të shumta, si dhe i qendrës kulturore, qendrës shëndetësore dhe disa objekteve sportive shënuan vitin e kaluar në Plavë, tha për radion tonë njeriu i parë i qytetit, Nihad Canoviq.

Deri në ditën e Komunës, më 25 korrik, do të hapet Shtëpia për të Moshuarit.

Ai thekson se shteti duhet të rrisë nivelin e investimeve në veri, i cili saç thotë ai, është lënë pas dore për shumë kohë.

Ai e sheh bujqësinë dhe turizmin si degë strategjike të zhvillimit të rajonit të Plavës.

"Një rrugë e re që do të jetë shtesë për anashkalimet rreth sheshit të qytetit që do të lidhë rrugën nga Qendra Kulturore me Qendrën Shëndetësore. Pres që të fillojmë punën për të muajin e ardhshëm", tha Canoviq.

Veriu i Malit të Zi është lënë pas dore për shumë kohë, konsideron Canoviq.

"Një shtet që dëshiron zhvillim të balancuar rajonal, siç e duam zyrtarisht në të gjitha aktet, duhet së pari të investojë në të gjitha komunat veriore. Sepse mënyra aktuale e modelimit të buxhetit kapital nuk mund të eliminojë pabarazitë që kemi në veri, qendër dhe jug", tha Canoviq.

Turizmi dhe bujqësia njihen si degë strategjike të zhvillimit të Plavës, thotë njeriu i parë i asaj komune, Nihad Canoviq.

KUVENDI I KOSOVËS S’GJEN RRUGËDALJE - 47 DËSHTIME RADHAZI

Për të 47-ën herë me radhë, përpjekja për konstituimin e Kuvendit të Kosovës përfundoi pa sukses më 15 korrik.

Edhe kësaj radhe, mbledhja e deputetëve të zgjedhur nuk solli ndonjë ndryshim në ngërçin politik që po zgjat tash e tre muaj.Partitë deri më tash në opozitë - PDK, LDK, AAK dhe Lista Serbe - refuzuan të propozojnë anëtarët për komisionin që duhet të organizojë votimin e fshehtë për zgjedhjen e kryetarit të Kuvendit.

Ata e konsiderojnë këtë procedurë si të papajtueshme me Kushtetutën dhe e kanë kundërshtuar në mënyrë të përsëritur.

Lëvizja Vetëvendosje, si fituese e zgjedhjeve parlamentare të shkurtit, insiston se votimi i fshehtë është në përputhje me ligjin dhe kërkon që procesi të mos bllokohet më tej.

Emërimi i kandidates së saj, Albulena Haxhiu, për kryetare të Kuvendit u hodh disa herë në votim të hapur, por nuk mori mbështetjen e nevojshme, pasi opozita e votoi kundër.

Në seancën e 15 korrikut, kryesuesi Avni Dehari ua ndërpreu fjalën deputetëve të PDK-së, LDK-së dhe AAK-së, të cilët nisën të adresonin problemin e ngërçit, në vend që të propozonin anëtarët për komisionin që do të mbikëqyrte votimin e fshehtë.

Seanca u ndërpre, për të vazhduar më 17 korrik.

LIMAJ: NE KEMI ZGJATUR DORËN PËR ZHBLLOKIM, DO TË BISEDOJ ME KURTIN

Fatmir Limaj nga Nisma Socialdemokrate pas dështimit të 47-të të konstituimit të legjislaturës së nëntë të Kuvendit të Kosovës, ka thënë se kjo parti ka ofruar zgjidhje për dalje nga ngërçi politik.

“Ne e kemi zgjatur dorën për t’ia dhënë një mundësi dhe të mos quhet ngërç apo situatë e bllokuar, pra për ta zhbllokuar. Ne ia kemi zgjatur dorën e bashkëpunimit për të ndërtuar shumicën parlamentare. Nga Nisma është gatishmëria, dëshira, veprimi konkret për të gjetur një zgjidhje. Do të doja edhe të tjerët të ofronin zgjidhje konkrete”, ka thënë Limaj.

“Do të bisedoj me kryeministrin për të ardhur te një moment i zgjidhjes së situatës...Drejtuesit duhet të tentojnë për më të mirën e vendit”, tha ai.

Ai shtoi se komunikimi është çelësi fillestar i zgjidhjes.

OSMANI: SERBIA PËRPIQET VAZHDIMISHT TA DESTABILIZOJË KOSOVËN

Presidentja e Kosovës, Vjosa Osmani, akuzoi Serbinë se po vepron si dorë e zgjatur e përpjekjeve të Rusisë për të destabilizuar Ballkanin Perëndimor, por nuk e përsëriti deklaratën e mëparshme për rolin e pretenduar të presidentit amerikan, Donald Trump, në parandalimin e një përshkallëzimi të situatës nga Serbia në Kosovë.Duke folur sot në Rigë të Letonisë, përkrah presidentit letonez, Edgars Rinkeviç, Osmani e hodhi poshtë nocionin e “tensioneve” mes Kosovës dhe Serbisë, duke e paraqitur situatën si agresion nga njëra palë dhe vetëmbrojtje nga tjetra.

“Unë nuk do t’i quaja tensione mes Kosovës dhe Serbisë, sepse ne përpiqemi të mos biem në kurthin e barazimit të të dyja palëve”, tha Osmani, duke iu përgjigjur pyetjes së një gazetari se cili është roli i Rusisë në tensionet dhe përshkallëzimet mes Kosovës dhe Serbisë. “Ne nuk duhet ta fusim kurrë agresorin dhe viktimën në të njëjtin thes. Serbia përpiqet vazhdimisht ta destabilizojë vendin tonë, përfshirë përmes akteve të agresionit, ndërsa ne mbrohemi vazhdimisht,” tha Osmani.

“Ne kurrë nuk kemi pushtuar ose sulmuar, madje as edhe një centimetër të territorit të ndonjë fqinji. Ajo çfarë kemi bërë gjithmonë dhe do të vazhdojmë ta bëjmë, është ta mbrojmë pavarësinë tonë, ta mbrojmë integritetin tonë territorial, ta mbrojmë paqen dhe lirinë, që janë fituar me shumë sakrificë”, tha presidentja e Kosovës.

GJERMANIA ËSHTË GATI TË MARRË MË SHUMË PËRGJEGJËSI PËR MBROJTJE TË EVROPËS

Gjermania ka njoftuar angazhime të reja të rëndësishme në fushën e mbrojtjes, duke sinjalizuar rritjen e rolit të saj në sigurinë evropiane.

Ministri gjerman i Mbrojtjes, Boris Pistorius, deklaroi nga Uashingtoni se Gjermania, në bashkëpunim me SHBA-në, është gati të dërgojë dy sisteme të mbrojtjes ajrore Patriot në Ukrainë, me një vlerë totale prej rreth dy miliardë euro – të cilat do të financohen nga Berlini.

Pas takimit me homologun amerikan Pete Hegseth, Pistorius theksoi gjithashtu se Gjermania është “e gatshme të marrë përsipër përgjegjësi më të mëdha” për frenimin dhe mbrojtjen në Evropë, duke reflektuar vendimet e fundit në samitin e NATO-s për të rritur shpenzimet e mbrojtjes në 5% të PBB-së. 

Komiteti i Buxhetit ka miratuar që Berlini të shpenzojë 3.5% të PBB-së për modernizimin e ushtrisë gjermane (Bundeswehr) deri në vitin 2029.

Gjermania planifikon gjithashtu të blejë raketa të avancuara me rreze të gjatë veprimi Typhon nga Shtetet e Bashkuara.

Ministri gjerman e përshëndeti gjithashtu një ndryshim të tonit nga Shtetet e Bashkuara, duke theksuar rëndësinë e mesazheve të qarta të Presidentit Trump kundrejt Kremlinit.

Sipas tij, ultimatumet dhe kërcënimi me sanksione ndaj Rusisë janë një hap i rëndësishëm përpara për sigurinë e Ukrainës dhe të Evropës.

KREMLINI: DEKLARATAT E TRUMP “KANË NEVOJË PËR ANALIZË”

Kremlini ka reaguar pas paralajmërimeve të fundit nga presidenti i SHBA-së Donald Trump, se SHBA do ta ndëshkojë Rusinë me tarifa nëse nuk arrihet marrëveshja për t’i dhënë fund luftës në Ukrainë brenda 50 ditëve.

Zëdhënësi i Kremlinit, Dmitry Peskov,  në një dalje për mediat ka thënë që “këto janë serioze dhe kërkojnë analizë”.

Peskov theksoi se presidenti rus Vladimir Putin “do të komentojë nëse e sheh të nevojshme”, duke shtuar.

Ai përsëriti se Rusia është e gatshme për raundin e ardhshëm të negociatave me Ukrainën, por pretendoi se nuk ka pasur ende ndonjë propozim nga Kievi.

Sipas tij, vendimet e fundit nga Uashingtoni dhe Brukseli janë një sinjal për Ukrainën që të vazhdojë luftën.

Sa i përket raportimit të Financial Times, ku Trump thuhet se i kërkoi Zelenskyt të godasë Moskën dhe Shën Petersburgun nëse SHBA ofron armë me rreze të gjatë, Peskov e komentoi se “një retorikë e tillë u shfaq në mediat perëndimore më herët”.

“Publikime të tilla zakonisht rezultojnë të jenë të rreme, megjithëse ndonjëherë ka rrjedhje serioze”.

Donald Trump ka inkurajuar privatisht Ukrainën të shtojë sulmet në thellësi të territorit rus, madje duke e pyetur presidentin ukrainas Volodymyr Zelensky nëse do të ishte në gjendje të godiste Moskën nëse SHBA do t’i siguronte armë me rreze të gjatë veprimi.

NEGOCIATAT PËR ARMËPUSHIM NË GAZA, MINISTRI I JASHTËM I KATARIT: DISKUTIMET PO VAZHDOJNË PËR NJË AKORD PARAPRAK

Bisedimet për armëpushim në Gaza mbeten në një fazë të hershme pas më shumë se një jave negociatash, por ndërmjetësit po shtojnë përpjekjet e tyre për të ndërmjetësuar një armëpushim midis Izraelit dhe Hamasit, thonë negociatorët e Katarit.

“Diskutimet mbi marrëveshjen kornizë po vazhdojnë. Të dy delegacionet janë këtu në Doha dhe ndërmjetësit po shtojnë përpjekjet e tyre për të arritur një marrëveshje”, u tha gazetarëve zëdhënësi i Ministrisë së Jashtme të Katarit, Majed Al-Ansari.

“Negociatat janë ende në fazën e parë, e cila ka të bëjë konkretisht me arritjen e një marrëveshjeje në parim para negociatave që do të fillojnë në fazën tjetër”, tha ai.

“Nuk mund të themi nëse do të arrihet një marrëveshje nesër apo nëse negociatat do të dështojnë nesër”, shtoi Ansari, duke vënë më tej në dukje se beson se nuk ka bllokim, dhe se nuk është caktuar asnjë orar për bisedimet.

RRITJA EKONOMIKE E KINËS TEJKALON PRITSHMËRITË, PAVARËSISHT TARIFAVE TË TRUMPIT

Ekonomia e Kinës ka shënuar rritje më të mirë se pritej, pavarësisht tarifave të SHBA-së dhe krizës së gjatë në tregun e pronave që kanë ndikuar në ngadalësimin e saj.

Sipas të dhënave zyrtare, ekonomia e Kinës u rrit për 5.2% në tremujorin që përfundoi në qershor, krahasuar me të njëjtën periudhë të vitit të kaluar.

Kjo rritje është pak më e lartë se parashikimi i ekonomistëve prej 5.1%, por më e ulët se në tremujorin e mëparshëm.

Ekonomia e dytë më e madhe në botë e shmangu një rënie të madhe, pjesërisht falë masave të marra nga Qeveria dhe një marrëveshjeje të dobët tregtare me SHBA-në.

NESËR MOT I NDRYSHUESHËM

Nesër  në jug paralajmërohet mot kryesisht me diell, herë pas here me vranësira të lehta deri mesatare . Në veri mot pjesërisht i vranët me intervale me diell. Gjatë pasdites, në zonat malore , janë të mundshme destabilizime  të shkurtra. Era do të fryjë e lehtë deri mesatare nga drejtimet e ndryshme , lokalisht e fortë nga veriu.

Temperatura e mëngjesit nga 11 deri në 25, kurse maksimalja ditore nga 24 deri në 37 gradë.