Ditari 22.04.2024

Ditarin e përgatiti, Violeta Gjokaj

Shimun: Asnjëherë nuk ka qenë pjesë e lobit farmaceutik

Në Kuvendin e Malit të Zi edhe sot në rendin e ditës janë pyetjet e deputetëve. I pari që u përgjigj në pyetjet ishte ministri i Shëndetësisë Vojisllav Shimun, duke thënë se ai asnjëherë nuk ka qenë pjesë e lobit farmaceutik. Deputeti i Partisë Boshnjake, Ervin Ibrahimoviq, e pyeti ministrin e shëndetësisë nëse në pesë muajt e punës së tij i kishte analizuar dobësitë e sistemit shëndetësor dhe tendencën e mjekëve për t'u larguar nga Mali i Zi. Sipas ministrit Shimun, ai do të tentojë të rikthejë reputacionin e shëndetësisë me njerëz të respektuar në shoqëri dhe që respektojnë kolegët e tyre. Deputeti i PDS-së, Nermin Abdiq, e pyeti ministrin se çfarë do të bënte për të reduktuar listën e pritjes, ndërsa Shimun tha se listat e pritjes janë problem i madh në shëndetësi. Afro 2000 mjekë punojnë në sistemin shëndetësor, 25 mjekë kanë ardhur nga Serbia. Shimun kujtoi se nga viti 2014 deri në vitin 2018, 101 mjekë janë larguar nga sistemi shëndetësor publik në Mal të Zi. Ndërkaq, ministrja e Punës dhe Mirëqenies Sociale, Naida Nishiq ka thënë se Qeveria ka ndarë rreth 25 milionë euro për kategoritë më të vështira për punësim të të papunëve.

Rezultate të shkëlqyera të Kuvendit në reformat e nevojshme për anëtarësim në BE

Parlamenti i Malit të Zi ka arritur rezultate të mëdha në reformat që janë të nevojshme për procesin e mëtutjeshëm të anëtarësimit në Bashkimin Evropian (BE), u bë e ditur në takimin e kryetarit të Kuvendit të Malit të Zi Andrija Mandiq me kolegun e tij hungarez Lasl Kover.

Siç njoftoi Kuvendi, Mandiq u takua me Koverin në Palma de Majorka të Spanjës, gjatë Konferencës së Kryetarëve të Parlamenteve të Shteteve Anëtare të BE-së.

“Të dy presidentët kujtuan bisedën e tyre në Budapest dhe në këtë kontekst arritën në përfundimin se Parlamenti i Malit të Zi ka arritur rezultate të mëdha kur bëhet fjalë për reformat e nevojshme për procesin e mëtejshëm të anëtarësimit në BE”, thuhet në deklaratë.

Sipas raportimeve, Mandiq dhe Kover diskutuan gjithashtu luftën intensive që Mali i Zi po zhvillon kundër krimit të organizuar.

Në takim u diskutua edhe për problemet e shumta që prekin rajonin dhe mbarë Evropën.

Projektligji për parandalimin e korrupsionit është hartuar pa konsultim me profesionistë

Projektligji për parandalimin e korrupsionit duhet të kthehet në debat publik, sepse është hartuar pa konsultim me profesionistë, sektorin civil dhe mediat, paralajmërojnë nga MANS-i, që me mbështetjen e 36 organizatave joqeveritare i dërgoi letër të hapur ministrit të Drejtësisë, Andrej Milloviq. Drejtori i Qendrës kërkimore të MANS-it, Dejan Millovac, thekson se është planifikuar amnisti për zyrtarët publikë të cilët para pesë ose më shumë vitesh kishin dorëzuar raporte të pasakta financiare për të ardhurat dhe pasurinë.

Tubimi i mbështetjes për Katniq para PSSH-së

Një grup qytetarësh janë mbledhur para ndërtesës së Prokurorisë Speciale të Shtetit, në mbështetje të ish-kryeprokurorit special Millivoj Katniq.

Tubimi u organizua me sloganin “Stop persekutimit dhe drejtësisë selektive”.

Ata kërkuan që Katniq të lejohet të mbrohet nga liria, për shkak të shëndetit të dëmtuar, duke deklaruar se i është vënë në pikëpyetje jeta.

Të mbledhurit derdhën ngjyrë të kuqe, e cila, siç raportohet, simbolizon gjakun e derdhur malazez.

Katniq u arrestua me urdhër të PSSH-së më 14 prill, dhe dy ditë më vonë atij i ishte caktuar masa e paraburgimit deri në 30 ditë.

Bllokimi i rrugës Cetinë – Podgoricë

Ish-punëtorët e “Koshutës” nga Cetina edhe sot kanë bllokuar trafikun ndërmjet Podgoricës dhe Cetinës. Punëtorët vendosën të ndërmarrin një hap të tillë, pasi nuk morën asnjë përgjigje për kërkesat e tyre nga protesta e së premtes para Qeverisë. “Do të ndalojmë qarkullimin edhe të mërkurën nga ora 12:00 deri në orën 15:00, të premten nga ora 11:00 deri në orën 16:00 dhe të dielën e ardhshme nga ora 12:00 deri në orën 15:00. Për këtë lloj proteste është dashur të vendosim që të tregojmë edhe një herë situatën në të cilën ndodhemi. U kërkojmë falje qytetarëve, por u detyruam ta radikalizojmë protestën, sepse nuk morëm asnjë përgjigje nga Qeveria”, ka thënë përfaqësuesja e punëtorëve, Diana Vujoviq. Ish-punonjësit e “Koshutës” kërkojnë pagesën e nëntë pagave të papaguara për 693 punëtorë, si dhe lidhjen e stazhit të punës për 81 prej tyre.

Greva e punëtorëve të arsimit ishte e paligjshme

Greva e punëtorëve të arsimit këtë vit ishte e paligjshme, thuhet në vendimin e shkallës së parë të Gjykatës Themelore të Podgoricës. Siç thekson Gjykata, Ligji për procesin minimal të punës është miratuar në mënyrë të njëanshme dhe nuk është në përputhje me Ligjin për grevat. Nga Sindikata paralajmërojnë ankesë. Nga Ministria e arsimit kumtuan ndërkohë se nuk do të ndërmarrin asnjë masë dhe nuk do të iniciojë procedura për të përcaktuar përgjegjësinë e punëtorëve për pjesëmarrjen në atë që ata thanë se ishte grevë ilegale. Ata thanë se si deri tani edhe në të ardhmen do të punojnë në dobi dhe jo në dëm të asnjë punëtori të arsimit dhe se do të jenë një partner i sigurt dhe i besueshëm në çdo dialog të mirëfilltë.

Spajiq ka uruar komunitetit hebre në Mal të Zi për festën më të madhe hebraike, Pesach

Kryeministri Milojko Spajiq ka uruar të gjithë pjesëtarët e komunitetit hebre në Mal të Zi për festën më të madhe hebraike, Pesach.

“Ju përgëzoj sinqerisht për festat, të cilat ju frymëzojnë dhe ju bëjnë krenarë për kontributin tuaj të pamatshëm në progresin e përgjithshëm”, tha Spajiq.

Ai tha se tradita, kultura dhe spiritualiteti hebre janë pasuria dhe dekorimi i Malit të Zi.

“Dhe kjo na bën të theksojmë me krenari depërtimin e dallimeve të shumta, që është një nga parimet themelore mbi të cilat mbështetet Bashkimi Evropian”, tha Spajiq.

Gazdiq: Jam shumë optimist se do ta mbyllim kapitullin 27

Ligji për menaxhimin e mbeturinave hyn në fuqi sot, tha drejtori i Agjencisë për Mbrojtjen e Mjedisit, Millan Gazdiq, dhe theksoi se është shumë optimist kur është fjala për mbylljen e kapitullit 27 që ka të bëjë me menaxhimin e mbeturinave.

Është Dita e Tokës dhe tema e këtij viti është "Planeti kundër plastikës" dhe dëshira është të vëmë në dukje dëmin që plastika i bën shëndetit të njerëzve dhe planetit.

Drejtori i Agjencisë për Mbrojtjen e Mjedisit, Millan Gazdiq, përkujtoi në emisionin “Link” në  Radion e Malit të Zi se sot në vendin tonë hyn në fuqi Ligji për menaxhimin e mbeturinave.

“Menaxhimi i mbetjeve në Mal të Zi është një nga problemet më të mëdha që kemi sepse Mali i Zi është një vend turistik dhe nuk është mirë të shohësh deponi në të gjithë Malin e Zi dhe mendoj se miratimi i këtij ligji është gjëja kryesore në zgjidhjen e këtij problemi dhe se me zbatimin e ligjit mund ta zgjidhim dukshëm këtë problem”, tha Gazdiq.

Ai tha se do të ndryshojë pjesën e ligjit që i referohet politikës kriminale.

Gazdiq përkujtoi se të gjitha vendet që u bënë anëtare të Bashkimit Evropian para nesh ishin të fundit që mbyllën kapitullin 27. Megjithatë, kur është fjala për Malin e Zi, ai është optimist sepse, siç tha, ne kemi shumë mbështetje nga Bashkimi Evropian.

Benzina më e shtrenjtë për dy centë

Nga mesnata çmimi i benzinës do të shtrenjtohet për dy cent, ndërsa çmimi i Eurodieselit do të jetë një cent më i ulët, njofton Ministria e Energjisë dhe Minierave. Eurosuper 95 dhe 98 do të rriten për dy cent dhe në 15 ditët e ardhshme do të kushtojnë 1.64 euro, gjegjësisht 1.68 euro. Çmimi i Eurodieselit do të jetë një cent më i lirë dhe do të kushtojë 1.48 euro, ndërkaq çmimi i naftës për ngrohje do të mbetet i pandryshuar.

BE kushtëzon integrimin e Serbisë me normalizim të marrëdhënieve me Kosovën 

Detyrimet e Serbisë të dala nga marrëveshjet e arritura me Kosovën, tani janë zyrtarisht pjesë e procesit të integrimeve evropiane të këtij shteti. Këshilli i Ministrave të BE-së, në takimin që po mbahet në Luksemburg ka miratuar ndryshimet  në kapitullin 35 në negociatat e anëtarësimit në mes të Brukselit dhe Beogradit. Në tekstin e ndryshuar thuhet se Serbia duhet t’i zbatojë të gjitha obligimet që dalin nga marrëveshja për rrugën drejt normalizimit të raporteve mes Kosovës dhe Serbisë, dhe aneksit të zbatimit të dakorduar në mars të vitit 2023 në Ohër. Zëdhënësi i BE-së, Peter Stano konfirmoi dhe përshëndeti miratimin e tekstit në takimin ministror, duke nënvizuar se si Kosova ashtu edhe Serbia kanë pranuar se detyrimet e tyre përkatëse që rrjedhin nga marrëveshja për rrugën drejt normalizimit do të bëhen pjesë integrale e rrugëve të tyre të integrimit evropian.“Ne mirëpresim miratimin e sotëm nga Këshilli të standardeve të përkohshme të përditësuara, përfshirë Marrëveshjen në Kapitullin 35 të negociatave të pranimit për Serbinë”, ka thënë Stano në një prononcim me shkrim dërguar medieve. Kosova për dallim nga Serbia nuk ka akoma status kandidati për anëtarësim në BE. Andaj detyrimet e Kosovës që dalin nga dialogu me Serbinë do përfshihen në Grupin Special për normalizim. Sipas Stanos agjenda e takimit të radhës së këtij grupi gjithashtu do të përditësohet. 

Kurti u ka bërë thirrje komuniteteve jo shumicë të marrin pjesë në regjistrimin e popullsisë

Kryeministri i Kosovës, Albin Kurti u ka bërë thirrje komuniteteve joshumicë të marrin pjesë në regjistrimin e popullsisë. Kurti ka deklaruar se regjistrimi i

popullsisë, ekonomive familjare dhe banesave është një ndër ndërmarrjet më të rëndësishme për Kosovën. “Ai nuk është thjesht një shënim statistikor; është deklaratë e fuqishme e identitetit, të drejtave, dhe vendit të secilit qytetar në shoqërinë tonë”, ka thënë Kurti duke iu referuar qytetarëve të komuniteteve serb, boshnjak, turk, ashkali, egjiptian, romë e goran.

14 palestinezë janë vrarë pas shpërthimit të dhunës në Bregun Perëndimor

Forcat izraelite vranë 14 palestinezë gjatë një bastisjeje në Bregun Perëndimor gjatë fundjavës, ndërsa një shofer ambulance u vra teksa shkoi për të marrë të plagosurit nga një sulm i tjetër i kolonëve të dhunshëm hebrenj, thanë autoritetet palestineze. Lufta e Gazës ka lënë në hije dhunën e vazhdueshme në territor, duke përfshirë sulmet e rregullta të ushtrisë ndaj grupeve militante, sulmet nga kolonët agresivë hebrenj në fshatrat palestineze dhe sulmet në rrugë nga palestinezët ndaj izraelitëve. Ndërkohë, kryeministri Benjamin Netanyahu është zotuar të refuzojë çdo sanksion ndaj ushtrisë së vendit, pas raportimeve se SHBA planifikon të shkurtojë ndihmën për njësinë Izraelite Netza Jehuda mbi shkeljet e dyshuara të të drejtave të njeriut në Bregun e pushtuar perëndimor.

“Rusia ka mobilizuar 300 mijë luftëtarë”, Zelensky: Brenda kësaj date synohet pushtimi i një qyteti në rajonin e Donetskut

Presidenti i Ukrainës, Volodymyr Zelensky ka deklaruar se Rusia po bëhet gati për të pushtuar qytetin e Khasivit në rajonin e Donjetskut deri më datën 9 maj, kur festojnë edhe fitoren kundër nazizmit. Në një deklaratë të bërë në mbrëmje, Zelensky u shpreh se Moska ka mobilizuar 300 mijë ushtarë që brenda datës 1 qershor do të dërgohen për të luftuar në Ukrainë. Ndër të tjera duke komentuar ndihmën e miratuar nga SHBA për Ukrainën, ai theksoi faktin që ushtarëve ukrainas në rajonin e Donetskit u mungojnë pajisjet e duhura për t’u përballur me Rusinë.

SHBA ja do të tërheq ushtarët e saj nga Nigeri

SHBA-ja ka pranuar të tërheqë ushtarët e saj nga Nigeri, shteti i Afrikës Perëndimore, me kërkesë të administratës që erdhi në pushtet pas grushtit të shtetit, transmeton Anadoll. Sipas lajmeve në mediat lokale, vendimi për tërheqjen e trupave u mor pas takimeve të kryera në Washington midis zëvendës Sekretarit të Shtetit të SHBA-së, Kurt Campbell dhe kryeministrit të Nigerit, Ali Mahamane Lamine Zeine. Në lajme thuhet se SHBA-ja ka pranuar të mbyllë bazën e mjeteve ajrore pa pilot që ndodhet në afërsi të Agadezit, në shkretëtirën e Saharasë. Një delegacion amerikan pritet të shkojë në Niamey, kryeqytetin e Nigerit, brenda pak ditësh për të siguruar tërheqjen e rregullt të rreth 1.000 ushtarëve.

Bassem Al-Awadi: Vizita e presidentit të Turqisë, Erdogan në Irak, do të ketë një "hap cilësor" në marrëdhëniet mes dy vendeve

Zëdhënësi i Qeverisë së Irakut, Bassem Al-Awadi, tha se me vizitën e sotme të presidentit të Turqisë, Recep Tayyip Erdogan në Irak, do të ketë një "hap cilësor" në marrëdhëniet mes dy vendeve. Në deklaratën për Anadolu, Al-Awadi vlerësoi vizitën e presidentit Erdogan në Irak, si reflektimet e vizitës në marrëdhëniet midis dy vendeve dhe pritjet nga kjo vizita. "Me vizitën e Presidentit Erdogan do të ndodhë një hap i rëndësishëm dhe cilësor në marrëdhëniet midis Irakut dhe Turqisë ", tha ai, duke theksuar se përgatitjet për vizitën kanë filluar prej rreth një viti. Ai tha se puna e komisioneve të përbashkëta për çështjet e "ujit, Projektit të Rrugës së Zhvillimit, pranisë së organizatës terroriste PKK në Irak dhe investimeve të kompanive turke në Irak", të cilat do të jenë në tryezë gjatë takimeve të Erdoganit në Bagdad, kanë përfunduar.

Nesër mot i ndryshueshëm

Sot ne Mal te Zi mban mot me vranësira të pakta deri mesatare . Frynë erë e dobët deri mesatare nga drejtimet e ndryshme. Temperaturat e shënuara në orën 14:Tivar , Herceg Novi, Ulqin e Budvë 19 gradë Podgoricë 18, Beran e Bijello Pole 16,Cetinë, Nikshiq e Shavnik 15, Plevle e Andrievicë 14, Kollashin, Rozhajë e Petnjicë13, Plluzhinë e Guci 12 dhe në Zhablak 7 gradë.   

Për nesër meteorologët paralajmërojnë të mbajë mot i ndryshueshëm, me reshje lokale të shiut dhe bubullimë. Reshje më intensive priten paradite në pjesët jugore dhe juglindore. Do të fryjë erë e dobët deri mesatare nga drejti9met e jugut. Temperatura e mëngjesit do të jetë prej 0 deri në 11 kurse më e larta e ditës prej 10 deri në 19 gradë celsius.