Beta [ Objavio: O.Z. ]

SJEDNICA VLADE

Srbija zahtijeva hitno izručenje Haradinaja

Direktor Kancelarije Vlade Srbije za Kosovo i Metohiju, Marko Đurić rekao je da Srbija zahtijeva "hitno i neodložno" izručenje nekadašnjeg lidera Oslobodilačke vojske Kosova Ramuša Haradinaja Srbiji, i pozvao sve zemlje Evropske unije da poštuju međunarodno pravo i da u tom slučaju "ne donose političke odluke".

"Srbija će nastaviti sa gonjenjem svih okrivljenih za ratne zločine bez obzira na nacionalnost, Srbija poziva sve zemlje članice EU i druge zemlje da poštuju međunarodno pravo, a ne da poštuju političke odluke", rekao je Đurić na konferenciji za novinare u Beogradu poslije sjednice Vlade Srbije povodom odluke francuskog suda da Haradinaj uslovno bude na slobodi dok čeka odluku o ekstradiciji po zahtjevu Srbije.

Đurić je dodao da Srbija ne prihvata "lažnu pravdu" i to da zločini protiv Srba budu dozvoljeni ako je to u interesu velikih sila.

Dodao je da obavještava Francusku da će se Srbija odnositi prema njenim potjernicama onako kako se ona bude odnosila prema potjernicama Srbije koje su u Interpolu.

On je rekao da će Srbija nastaviti da goni one koji su počinili "zločine protiv prava i pravde", "makar Srbija bila ostrvo u Evropi"

Đurić je iz pročitao i neke od iskaza protiv Haradinaja u kojima se navedi da je naložio zlostavljanje i zatvaranje civila, da je silovao jednu maloljetnu djevojku i tukao je i da su je potom 40 sati silovali drugi pripadnici OVK.

On je pročitao iskaze i o tome kako je jedan pripadnik OVK pištoljem ubio dvonedjeljnu bebu i potom joj odrubio glavu.

Đurić je pitao i da li se medjunarodna zajednica bori za vladavinu prava, ili štiti one koji se zalažu za politiku sile.

"Da li je moguće da Srbiji neko nešto prebacuje zato što traži Haradinaja i da joj neko prebacuje za poglavlje 23 i 24?", rekao je Đurić.

On je upitao i da li je u redu zanemarivati ratne zločine, a tražiti one "koji su porušili nekakve barake".

Ministarka pravde Srbije, Nela Kuburović, rekla je da su sve države-članice Interpola obavezne da postupaju po potjernicama te organizacije, i da se nada da će Francuska u što kraćem roku izručiti Haradinaja.

Ona je dodala da nije moguće pozivati se na to što je Ramuš Haradinaja oslobođen pred haškim Medjunarodnim sudom za ratne zločine na prostoru bivše Jugoslavije, jer se Haradinaju pred Haškim tribunalom sudilo za djela počinjena u septembru 1998. godine, dok ga Srbija tereti za djela od jun 1999. godine.

Kuburović je rekla i da će se Srbija prema potjernicama drugih zemalja odnositi po principu reciprociteta i da ukoliko Haradinaj ne bude izručen, Srbija neće izručivati pa ni one koji se traže zbog terorizma.

"Ako neko ko je osuđen ili se protiv njega vodi postupak zbog zvjerskog ubijanja, mučenja, silovanja, torture, ukoliko ne bude izručen Srbiji mi ćemo istom mjerom uzvratiti na zahteve koje Francuska bude uputila prema nama", rekla je Kuburović.

Ona je kazala da u proširenoj istrazi protiv Haradinaja ima 30 novih svjedoka.

Haradinaj je pušten na uslovnu slobodu juče i ne smije da napušta Francusku sve dok pravosudni organi te zemlje ne donesu odluku o zahtjevu Srbije za njegovim izručenjem.

Haradinaj je uhapšen 4. januara po nalogu Srbije iz 2005. zbog sumnje da je 1998. i 1999. počinio ratne zločine nad Srbima i drugim nealbancima. Istraga protiv Haradinaja pokrenuta je 2004. godine.

Haradinaju je 2012. suđeno u Haškom tribunalu za ratne zločine, ali je oslobođen svih optužbi.