Objavio: P.R. [ Beta ]

EP TRAŽI

Zamrznuti pregovore s Turskom

Evropski parlament zatražio je danas zamrzavanje pregovora o pristupanju Turske Evropskoj uniji (EU) zbog "nesrazmjerne" represije od neuspjelog vojnog udara u julu 2016. u toj zemlji.

Poslanici Evropskog parlamenta su velikom većinom usvojili rezoluciju u kojoj se traži "privremeno zamrzavanje" procesa pristupanja Turske u EU započetog 2005. godine, čime se poveća mogućnost povećanja tenzija između EU i Turske iako rezolucija nije obavezujućeg karaktera.

Predsjednik Turske Redžep Tajip Erdogan izjavio je u srijedu da predstojeće glasanje u Evropskom parlamentu o zamrzavanju pregovora o članstvu Turske u Evropskoj uniji nije od važnosti za njegovu zemlju.

"Koji god rezultat da bude, to glasanje nema vrijednost u našim očima", rekao je Erdogan na godišnjem ekonomskom skupu Organizacije za islamsku saradnju u Istanbulu.

Erdogan je rekao da borba Turske za stabilnost i budućnost neće biti prekinuta "spuštanjem i podizanjem ruku" evropskih poslanika.

Zemlje EU su izražavale zabrinutost zbog velikih čistki u državnim službama, zbog navodne povezanosti sa pokretom muslimanskog sveštenika Fetulaha Gulena, koga Ankara optužuje da je organizovao puč.

Hapšenja novinara i prokurdskih političara, kao i zatvaranje stotine medija i nevladinih organizacija takođe su bili predmet kritika međunarodne zajednice.

Neke zemlje EU su pozivale na odlaganje pregovora o članstvu s Turskom, ali Unija pokušava da zauzme zajednički stav kojim bi bila uspostavljena ravnoteža između zabrinutosti zbog kršenja ljudskih prava u Turskoj i potrebe da Ankara nastavi da pomaže u zaustavljanju talasa izbjeglica u Evropu.