Ditari 22.07.2025

Ditarin e përgatiti Marash Dedvukaj

Kryeministri Millojko Spajiq ka caktua për nesër takimin e Këshillit të Sigurisë Kombëtare

Kryeministri Millojko Spajiq ka caktua për nesër takimin e Këshillit të Sigurisë Kombëtare, ku do të analizohet situata e sigurisë në Mal të Zi. Qeveria njoftoi se përveç situatës së sigurisë, fokusi do të jetë në analizën e efektivitetit të përgjigjes institucionale ndaj sfidave aktuale, përfshirë koordinimin e sektorit të sigurisë. Thuhet se, për shkak të rëndësisë dhe aktualitetit të temës, një ftesë për pjesëmarrje në seancë iu dërgua edhe Prokurorit të Lartë të Shtetit Millorad Markoviq, Kryeprokurorit Special Vlladimir Novoviq, Drejtorit të Policisë në detyrë Lazar Shqepanoviq dhe Shefit të Departamentit Special të Policisë Predrag Shukoviq. Seanca, pas së cilës do të publikohet një njoftim për shtyp, do të fillojë në orën 18:00.

Çarapiq - Data e mbajtjes së zgjedhjeve lokale brenda një dite do të dihet vetëm kur udhëheqësit e partive politike të arrijnë një konsensus

Data e mbajtjes së zgjedhjeve lokale brenda një dite do të dihet vetëm kur udhëheqësit e partive politike të arrijnë një konsensus, u njoftua në seancën e sotme të Komitetit për Reformën Gjithëpërfshirëse Zgjedhore. Bashkëkryetari i Komitetit, Vasilije Çarapiq nga Lëvizja Evropa Tani (PES), theksoi se data nuk mund të imponohet pa një marrëveshje paraprake politike. "Është një çështje politike. Ne u përpoqëm t'u jepnim udhëheqësve të partive hapësirë të mjaftueshme për të rënë dakord për datën", tha Çarapiq. Në seancë, deputetët diskutuan projektligjet për financimin e subjekteve politike dhe fushatave zgjedhore, si dhe projekt-amendamentet në Ligjin për Zgjedhjen e Këshilltarëve dhe Anëtarëve të Parlamentit. Në fillim të seancës, bashkëkryetari Nikolla Rakoçeviq nga Partia Demokratike e Socialistëve (DPS) kujtoi se reforma përfshin pesë segmente kryesore: “Këto janë arritja e një konsensusi për zgjedhjet brenda një dite, profesionalizimi i autoriteteve për zbatimin e zgjedhjeve, listat e hapura, zgjedhja e drejtpërdrejtë e kryetarëve të komunave dhe dy kryetarëve të bashkive, si dhe financimi i subjekteve dhe fushatave politike”, tha Rakoçeviq. Sipas tij, është planifikuar që Komisioni Shtetëror i Zgjedhjeve të shndërrohet në Komisionin Qendror të Zgjedhjeve, anëtarët e të cilit do të zgjidhen përmes konkursit. Trupi gjykues do të përbëhet nga përfaqësues të Shoqatës së Gjyqtarëve, sektorit joqeveritar, Universitetit të Malit të Zi dhe nga një përfaqësues nga qeveria dhe opozita. Përkujtojmë se Parlamenti i Malit të Zi miratoi propozimin e anëtarëve të Komisionit për Reformë Gjithëpërfshirëse Zgjedhore për të zgjatur afatin e punës së këtij organi deri më 31 dhjetor të këtij viti. Ndryshimi i Vendimit për formimin e Bordit parashikon një rritje të numrit të anëtarëve të këtij organi. Bordi, në vend të 14 anëtarëve aktualë, do të ketë 16 anëtarë - nga tetë nga qeveria dhe nga opozita.

Bogdanoviq - Çdo thirrje për dorëheqjen e kreut të sektorit të sigurisë nuk është një akt politikisht neutral

Çdo thirrje për dorëheqjen e kreut të sektorit të sigurisë në kohën kur organizatat kriminale përplasen me njëra-tjetrën me qëllim eliminimin e anëtarëve kundërshtarë nuk është një akt politikisht neutral, tha kryetari i Klubit të Deputetëve të Demokratëve, Boris Bogdanoviq. Zëvendëskryetari i URA-s, Blazho Ragjenoviq, vlerësoi se sektori i sigurisë malazeze është "ulur në gjunjë" dhe se qytetarët ndihen të pasigurt, dhe se zëvendëskryeministri Aleksa Beçiq, Ministri i Punëve të Brendshme Danillo Sharanoviq dhe Drejtori i Policisë në detyrë, Llazar Shqepanoviq, duhet të japin dorëheqjen. Bogdanoviq deklaroi se, në momentet kur organizatat kriminale përplasen me njëra-tjetrën, kur sundimi i ligjit godet për herë të parë rrënjët e tyre në sektorin e sigurisë, çdo thirrje për dorëheqjen e Shqepanoviqit, Sharanoviqit dhe Beçiqit nuk është një akt politikisht neutral. “Kjo është arsyeja pse kushdo që shpreh kërkesa të tilla, përpara se t’i përsërisë, duhet të shikojë mirë në pasqyrë dhe të pyesë nëse thirrja e tyre u sjell dobi interesave të shtetit apo qëllimeve të grupeve kriminale që duan të rrëzojnë ata që më në fund filluan t’i pastrojnë nga aparati shtetëror?”, tha Bogdanoviq.

Axhiq - Rikonstruimi i Qeverisë ose zgjedhjet e jashtëzakonshme janë të nevojshme që vendi të dalë nga kriza

Rikonstruimi i Qeverisë ose zgjedhjet e jashtëzakonshme janë të nevojshme që vendi të dalë nga kriza dhe ndalimit të kolapsit institucional, konsideron funksionari i Lëvizjes Qytetare URA Filip Axhiq. Ai tha se akuzat e bëra nga njoftimet midis Gjykatës Themelore dhe Administratës së Policisë, në një kohë kur disa vrasje, plagosje dhe rrahje disa personave që mbajnë pozicione të larta në vend ndodhën vetëm brenda pak ditësh, janë tregues i pafuqisë së institucioneve në luftën kundër krimit. Derisa qëllimi është të zhvendoset përgjegjësia dhe të ngatërrohet opinjoni, gjë që sjell gjithashtu trazira midis qytetarëve", tha Axhiq në deklaratë. Axhiq tha, se përveç sektorit të sigurisë, kriza në të cilën ndodhet Mali i Zi ndihet në çdo fushë.

N. Gjeloshaj - Prioritetet e mia më të larta janë partneriteti dhe vendosmëria për të forcuar marrëdhëniet midis Malit të Zi dhe Shteteve të Bashkuara të Amerikës

Partneriteti dhe vendosmëria për të forcuar marrëdhëniet midis Malit të Zi dhe Shteteve të Bashkuara të Amerikës janë ndër prioritetet e mia më të larta, njoftoi Zëvendëskryeministri për Politikë Ekonomike dhe Ministri i Zhvillimit Ekonomik Nikë Gjeloshaj. "Unë besoj se kushdo që dëshiron sinqerisht që Mali i Zi të ketë marrëdhënie të shkëlqyera me SHBA-në është i impresionuar nga fakti që kam pasur takime në nivelin më të lartë në Uashington, dhe platformat procedurale janë të vogla në krahasim me rëndësinë e kësaj vizite", theksoi Gjeloshaj. Sipas tij, kushdo që ka problem me partneritetin me SHBA-në është i bindur se nuk është në anën e duhur, as politikisht, as shoqërisht, as historikisht, as në kontekstin e zhvillimit ekonomik të Malit të Zi. "Unë vizitova Uashingtonin brenda fushëveprimit të kompetencave të mia, në cilësinë e Zëvendëskryeministrit dhe Ministrit të Zhvillimit Ekonomik", përfundoi Gjeloshaj.

Presidenti malazez Jakov Millatoviq uroi zgjedhjen e ambasadorëve malazezë në pesë shtete anëtare të Bashkimit Evropian

Presidenti malazez Jakov Milatoviq uroi zgjedhjen e ambasadorëve malazezë në pesë shtete anëtare të Bashkimit Evropian (BE), duke deklaruar se pret që ata të kontribuojnë më tej në arritjen e objektivave të politikës së jashtme të vendit. Siç u njoftua nga zyra e presidentit, Millatoviq priti ambasadorët e sapoemëruar në Francë, Belgjikë, Holandë, Kroaci dhe Bullgari - Dubravka Lalloviq, Olivera Injac, Milisav Raspopoviq, Dejan Vukoviq dhe Gjorgje Jankoviq. Millatoviq uroi ambasadorët për zgjedhjen e tyre në një post të rëndësishëm për Malin e Zi dhe u uroi suksese në misionin e tyre diplomatik. Në bisedën me ambasadorët, ai tha se pret që ata, gjatë mandatit të tyre, të japin një kontribut shtesë në arritjen e objektivave të politikës së jashtme të vendit - anëtarësimin e plotë të Malit të Zi në BE, anëtarësimin e besueshëm në NATO, si dhe forcimin e reputacionit ndërkombëtar të vendit.

Kurti: Këtë fundjavë do ta kemi lajmin për arritjen ose jo të një marrëveshjeje për institucionet

Kreu i Lëvizjes Vetëvendosje, njëherësh kryeministri në detyrë i Kosovës, Albin Kurti, tha se partia e tij ka gatishmëri për të bashkëqeverisur me Nismën Socialdemokrate të Fatmir Limajt, parti së cilës tha se i ka bërë ofertë konkrete. "Me Limajn kemi zhvilluar një takim pardje. LVV-ja dhe unë kemi shprehur interesimin dhe gadishmërinë për të bashkëqeverisur me Nismën Socialdemokrate dhe në përputhje me këtë unë kam bërë edhe një ofertë konkrete që gjithçka të përmbyllet sa më shpejt e mirë, të kemi konstituimin e Kuvendit dhe Qeverinë", tha Kurti gjatë një konference për media në Qeverinë e Kosovës. Kurti tha se nuk mund të ofrojë hollësi pasi kjo ofertë ende nuk është konkretizuar në marrëveshje, duke theksuar se "nevojitet të vazhdojnë bisedimet dhe vullneti politik", në mënyrë që të krijohen institucionet e reja. Kreu i LVV-së, partisë fituese të zgjedhjeve të shkurtit, tha se shpreson që bisedimet me partinë e Limajt të finalizohen gjatë kësaj jave. “Këtë fundjavë do ta kemi lajmin për marrëveshjen e arritur ose mungesën e saj”, tha Kurti.

Në Kosovë kërkohën për masakrën në Mejë, në Serbi janë figura publike

Banka e të akuzuarve në sallën e gjyqit në Prishtinë ishte e zbrazët kur nisi gjykimi për krimet e luftës, të kryera mbi 25 vjet më parë nga forcat ushtarake dhe policore serbe, në Mejë të Gjakovës. Nga mesi i qershorit, të akuzuarit po gjykohen në mungesë, pasi nuk janë në dispozicion të drejtësisë kosovare. Kundër tyre është lëshuar edhe një fletarrestim ndërkombëtar. Beogradi zyrtar, tash për tash, hesht. Ushtria e Serbisë thotë për Radion Evropa e Lirë se “nuk ka informacion” në lidhje me pjesëtarët e saj që figurojnë në aktakuzën e Kosovës, ndërsa policia nuk përgjigjet në pyetje. Më shumë se 50 të pandehur, përfshirë ish-udhëheqës të forcave ushtarake dhe policore serbe, akuzohen për vrasjen e 370 shqiptarëve të Kosovës në Mejë dhe në fshatra të tjerë përreth Gjakovës, gjatë luftës së vitit 1999. Mbi një çerek shekulli pas masakrës, shumica e të akuzuarve janë në pension, dhe kundër tyre në Serbi - zyrtarisht - nuk është duke u zhvilluar ndonjë hetim. Disa janë aktivë në jetën publike - shkruajnë dhe promovojnë libra, angazhohen në politikë dhe shfaqen në media. Në kërkim të të akuzuarve, Radio Evropa e Lirë analizoi bazat e disponueshme të të dhënave dhe arkivat. “Nuk më shkon ndërmend të shkoj në gjykim në Prishtinë, por do të paraqitesha gjithmonë para një gjykate në Beograd”, thotë për Radion Evropa e Lirë Momir Stojanoviq, ish-shef i sigurisë së Korpusit të Prishtinës dhe i dyshuar kryesor në aktakuzën e Kosovës. Si gjeneral ushtarak në pension, ai jeton në Nish - në jug të Serbisë. Deri në vitin 2016 ishte zyrtar i Partisë Përparimtare Serbe në pushtet, ndërsa sot thotë se është një “opozitar autentik” dhe kritik i ashpër i presidentit serb, Aleksandar Vuçiq.

Zelensky thotë se bisedimet e reja me Rusinë do të zhvillohen më 23 korrik

Presidenti ukrainas, Volodymyr Zelensky ka bërë të ditur se nesër më 23 korrik do të mbahet një rund i ri i bisedimeve me Moskën në Turqi, teksa Perëndimi rrit presionin ndaj Kremlinit për t’u pajtuar për një armëpushim, ndonëse forcat ushtarake ruse vazhdojnë të kryejnë sulme vdekjeprurëse në Kiev dhe qytete tjera ukrainase. “Sot kam diskutuar me Rustem Umerovin për përgatitjet për këmbim të të burgosurve dhe për një takim tjetër me palën ruse në Turqi”, ka thënë Zelensky në adresimin e tij ditor më 21 korrik, duke iu referuar shefit të ri të Këshillit ukrainas për Siguri Kombëtare dhe Mbrojtje. “Umerov ka raportuar se takimet janë planifikuar të mbahen më 23 korrik”, ka thënë presidenti ukrainas, pa dhënë më shumë hollësi. Umerov e ka mbajtur në të kaluarën pozitën e ministrit të Mbrojtjes dhe i ka udhëhequr dy runde takimesh me Rusinë. Dy ditë më parë, Zelensky ka thënë se ia ka dërguar Moskës një ofertë për runde të reja bisedimesh në javët e ardhshme, meqë takimet e zhvilluara muajin e kaluar nuk kanë rezultuar me përparim drejt paqes. Ai ka thënë se duhet bërë gjithçka që të arrihet armëpushimi.

OBSH-ja dënon sulmet izraelite në objektet e saj në Gazë

Organizata Botërore e Shëndetësisë (OBSH) ka thënë se ofensiva tokësore e Izraelit në qendër të Gazës, i ka penguar përpjekjet e saj për të vazhduar punën, meqë i janë goditur objektet. Kjo agjenci e Kombeve të Bashkuara i ka akuzuar forcat izraelite për sulm në një ndërtesë ku është strehuar stafi i saj dhe familjet e tyre në qytetin Deir al-Balah, dhe për keqtrajtim të atyre që kanë qenë në këto hapësira. Ushtria izraelite nuk i ka komentuar ende këto pretendime. Mijëra palestinezë janë detyruar të shpërngulen si pasojë e operacionit të parë të madh të ushtrisë izraelite në Deir al-Balah prej nisjes së luftës së nxitur nga Hamasi – organizatë e shpallur terroriste nga Shtetet e Bashkuara dhe fuqi të tjera – 21 muaj më parë. OKB-ja ka thënë se është duke pranuar informacione për persona të kequshqyer që janë duke shkuar nëpër klinika dhe spitale në gjendje shumë të rënduar. Të dielën, ushtria izraelite ka urdhëruar evakuim të menjëhershëm të gjashtë blloqeve në jug të Deir al-Balahut, me paralajmërimin se do të operojë “me forcë të madhe për t’i shkatërruar kapacitetet e armikut dhe infrastrukturën terroriste”.

Ministri iranian: Teherani nuk do ta braktisë programin bërthamor

Irani nuk ka plane për ta braktisur programin e vet bërthamor, përfshirë pasurimin e uraniumit, pavarësisht dëmit të madh që u është shkaktuar qendrave të veta, si pasojë e sulmeve amerikane muajin e kaluar, ka thënë ministri i Jashtëm iranian, Abbas Araghchi. Në një intervistë për kanalin televiziv amerikan, Fox News, Araghchi ka thënë se momentalisht pasurimi i uraniumit është ndalur, sepse “dëmet janë serioze dhe të rënda”. “Por, natyrisht që ne nuk mund të heqim dorë nga pasurimi, sepse është arritje e shkencëtarëve tanë”, ka thënë ai, duke e konsideruar gjithë këtë proces si “krenari kombëtare”. Sipas tij, çdo marrëveshje bërthamore që mund të arrihet, duhet ta ketë të përfshirë edhe të drejtën për pasurim uraniumi. Kur është pyetur nëse uraniumi i pasuruar është ruajtur diku nga sulmet, Araghchi ka thënë se “nuk ka informacion të detajuar”, por që Organizata e Iranit për Energji Atomike është duke tentuar “të bëjë vlerësime se çfarë ka ndodhur saktësisht me materialin e pasuruar”.

Të paktën 27 persona kanë humbur jetën pas rrëzimit të një aeroplan stërvitor të Forcave Ajrore të Bangladeshit

Të paktën 27 persona kanë humbur jetën pasi një aeroplan stërvitor i Forcave Ajrore të Bangladeshit u rrëzua në një kamp shkolle në Daka, thanë zyrtarët. Reuters raporton se midis të vdekurve ishin 25 fëmijë, një mësues dhe një pilot, dhe se 88 persona u shtruan në spital. Aeroplani F-7 BGI u rrëzua menjëherë pas ngritjes rreth orës 13:00 nga baza ajrore Kurmitola në kryeqytet në një mision rutinë stërvitor. Ushtria tha se aeroplani pësoi një defekt mekanik. Ndihmësi Special i Këshilltarit Kryesor të Shëndetësisë, Sajedur Rahman, u tha gazetarëve se 27 persona kishin vdekur dhe 88 ishin shtruar në spital me pasoja djegie. Qeveria shpalli një ditë zie, me flamuj në gjysmë shtizë dhe lutje të veçanta në të gjitha shërbesat.

Nesër mot tejet i nxehtë

Sot në Mal të Zi ka mbajt mot me diell dhe vende vende me vranësira kalimtare.Frynë erë e dobët deri e mesme nga drejtimi i jugut. Temparaturat në orën 14: Podgoricë 36 gradë, Beranë e B. Pole 34, Cetinë, Plevle, Plluzhinë e Andrievicë 33, H. Novi, Ulqin, Nikshiq, Kollashin, Shavnik e Petnicë 32, Tivar e Rozhajë 31 dhe në Zhablak 26 gradë.
Për nesër metereologët parashohin të mbajë mot me diell dhe tejet i nxehtë. Do të fryjë erë e dobët deri e mesme nga drejtimi i jugut. Temperature e mëngjesit do të sillet prej 13 deri në 25 kurse më e larta e ditës prej 26 deri në 38 gc.