Ditari 22.08.2025

Ditarin e përgatiti Marash Dedvukaj

Zyra e kryeministrit - Qeveritë lokale, duke ndjekur shembullin e kryeqytetit, mund të shpërblejnë zjarrfikësit që u angazhuan në shuarjen e zjarreve

Qeveritë lokale, duke ndjekur shembullin e kryeqytetit, mund të shpërblejnë zjarrfikësit që u angazhuan në shuarjen e zjarreve, njoftoi zyra e Kryeministrit Milojko Spajiq, duke potencuar se Qeveria do të mbulojë kostot e qëndrimit shtatëditor të të gjithë zjarrfikësve në Institutin "Simo Millosheviq". Zyra e Spajiqit e tha këtë në lidhje me reagimet e një pjese të opinjonit ndaj marrëveshjes midis Qeverisë dhe Kryeqytetit për shpërblimin e zjarrfikësve që morën pjesë në shuarjen e zjarrit. Ata theksuan se të ardhurat e anëtarëve të shërbimeve të mbrojtjes dhe shpëtimit, përfshirë shpërblimet, bien nën juridiksionin e punëdhënësit, domethënë, të vetëqeverisjes lokale. Zyra e Spajiqit tha se, në këtë rast të veçantë, fondet për pagesën e shpërblimeve për zjarrfikësit nga Podgorica u siguruan nga buxheti i Kryeqytetit, në shumën kumulative prej 1.5 mijë eurosh për secilin. "Përveç kësaj, duke vlerësuar faktin që anëtarët e shërbimeve të mbrojtjes dhe shpëtimit punuan në rrethana jashtëzakonisht të vështira, Qeveria do të mbulojë kostot e qëndrimit shtatëditor në Institutin Dr. Simo Millosheviq", të të gjithë zjarrfikësve të angazhuar e jo vetëm atyre nga Kryeqyteti, thuhet në deklaratë.

Ministria - forca dhe siguria e qytetarëve tanë janë misioni më i madh i Ushtrisë së Malit të Zi

Ushtria e Malit të Zi, së bashku me kolegët nga shërbime të tjera, luftoi kundër zjarreve të mëdha që kërcënuan njerëzit, shtëpitë e tyre dhe natyrën, njoftoi Ministria e Mbrojtjes. Në këtë betejë, siç deklaruan me keqardhje, humbi jetën një anëtar i Forcave të Armatosura të Malit të Zi, rreshteri i ri Dejan Bozhoviq, emri i të cilit, siç theksuan ata, do të mbetet përgjithmonë i gdhendur në kujtesën e Ushtrisë së Malit të Zi. "Guximi, këmbëngulja dhe bashkimi kanë treguar edhe një herë se forca dhe siguria e qytetarëve tanë janë misioni më i madh i Ushtrisë së Malit të Zi", thuhet nga Ministria.

Disa punëtor të Infrastrukturës Hekurudhore të Malit të Zi kanë hy në grevë për shkak të, siç thanë ata, pagave shumë të ulëta

Një grup punonjësish të Infrastrukturës Hekurudhore të Malit të Zi kanë hy në grevë për shkak të, siç thanë ata, pagave shumë të ulëta që marrin. "Ne kërkojmë koeficientë dhe kompensim për pagat sipas Ligjit për pagat,dhe nuk kërkojmë asgjë që nuk na përket. Duhet të dihet qartë se dispeçeri i trenit rregullon dhe është përgjegjës për sigurinë e trafikut të të gjithë pasagjerëve në tren, si dhe të sendeve dhe mallrave. Ata kërkojnë që përfaqësuesit e punëtorëve të thirren nga menaxhmenti. "Që disa prej nesh të marrin pjesë në takim, sigurisht që nuk mund të marrim pjesë të gjithë, sepse jemi shumë, që dy sindikata përfaqësuese, drejtori ekzekutiv, kryetari i bordit, drejtori i sektorit të transportit dhe dikush nga ministria të jenë të pranishëm. Le ta shkruajmë në letër, të japim hapësirë, të caktojmë një datë, të përfshihen propozimet tona në Marrëveshjen Kolektive dhe të theksojmë se askush nuk do të përballet me procedura penale dhe procedura disiplinore brenda Infrastrukturës Hekurudhore të Malit të Zi për këtë, siç kanë njoftuar tashmë", theksoi pos tjerash përfaqësuesi i puntorëve Andrej Kallugjeroviq.

M. Vukiqeviq - Ndërprerja e sotme e punës të një pjese të punonjësve të Infrastrukturës Hekurudhore të Malit të Zi është e paligjshme dhe ka shkaktuar dëme të mëdha materiale

Ndërprerja e sotme e punës të një pjese të punonjësve të Infrastrukturës Hekurudhore të Malit të Zi është e paligjshme dhe ka shkaktuar dëme të mëdha materiale dhe pasoja të rënda për rrjedhën e trafikut, njoftoi Ministria e Transportit. Siç u tha në përgjigjen e tyre, fakti që një tren ndërkombëtar u ndalua duke bllokuar shinat, në të cilat ende ndodhet prona e shtetasve të huaj, përfshirë vagonët e pasagjerëve. "Ministria e Transportit ka mbështetur vazhdimisht përmirësimin e kushteve të punës së punonjësve dhe, përmes ribalancimit të buxhetit, kemi siguruar 2.5 milionë euro shtesë për funksionimin e Infrastrukturës Hekurudhore të Malit të Zi. Pavarësisht kësaj, veprimi i sotëm nga disa punonjës u krye në një mënyrë përfundimtare, deri më tani të paprecedentë në Mal të Zi", njoftoi departamenti i drejtuar nga Maja Vukiqeviq.

PDS - Shqepanoviq dhe Markoviq, konfirmojnë se nuk kanë guxim të ndërmarrin veprime brenda juridiksionit të tyre

Drejtori i Përkohshëm i Administratës së Policisë, Lazar Shqepanoviq, dhe Prokurori i Lartë i Shtetit, Millorad Markoviq, konfirmojnë se nuk kanë guxim të ndërmarrin veprime brenda juridiksionit të tyre dhe vazhdojnë t'u shërbejnë me nënshtrim personaliteteve të kishës, tha Partia Demokratike e Socialistëve (PDS). "Monumenti i kasapit më famëkeq çetnik, Pavle Gjurishiq, udhëton pa pengesa nga kisha në manastir, me të cilin Kisha e Serbisë demonstron edhe një herë fuqinë e saj dhe tall shtetin, dhe shteti tregon pa mëdyshje se ka kapitulluar para Kishës së Serbisë", thuhet në deklaratën e PDS-së. “Kështu, në vend që të heqin monumentin e fashistit të deklaruar, i cili më parë ishte ngritur ilegalisht në fshatin Gornje Zaostro, të Beranës ku para policisë, një hordë çetnike e tërbuar rrihte dhe ngacmonte gazetarët, Shqepanoviq dhe Markoviq konfirmojnë se nuk kanë guximin të ndërmarrin veprime brenda juridiksionit të tyre dhe vazhdojnë t'u shërbejnë me nënshtrim personaliteteve të kishës”, thuhet në deklaratën e PDS.

Policia kufitare e Malit të Zi dhe e Kosovës do të rrisë numrin e patrullave të përbashkëta me qëllim parandalimin e të gjitha formave të krimit ndërkufitar

Policia kufitare e Malit të Zi dhe e Kosovës do të rrisë numrin e patrullave të përbashkëta me qëllim parandalimin e të gjitha formave të krimit ndërkufitar, u ra dakord në takimin e policisë kufitare të të dy vendeve. Ministria e Punëve të Brendshme e Malit të Zi (MUP) njoftoi se takimi, i cili u drejtua nga krerët e policisë kufitare të Malit të Zi dhe të Kosovës, Dejan Bojiq dhe Fehmi Xhata, u mbajt në Rozhajë. "Qëllimi i këtij takimi ishte të analizohej gjendja e sigurisë së kufirit të përbashkët shtetëror, me qëllim përmirësimin e bashkëpunimit ndërkufitar dhe luftën kundër të gjitha formave të krimit ndërkufitar", thuhet në deklaratë.

Shqekiq, nënshkroi një grant me Komisionin Evropian në shumën prej 480,000 eurosh, i cili siguron mbështetje për festimin e Javës Evropiane të Sportit në tre vitet e ardhshme

Ministri i Sportit dhe Rinisë, Dragoslav Shqekiq, nënshkroi një grant me Komisionin Evropian në shumën prej 480,000 eurosh, i cili siguron mbështetje për festimin e Javës Evropiane të Sportit në tre vitet e ardhshme, njoftoi departamenti qeveritar. Thuhet se ky vit përfaqëson një pikë kthese të rëndësishme - një dekadë kushtuar promovimit të jetës aktive dhe të shëndetshme në të gjithë Evropën. "Për Malin e Zi, kjo do të thotë forcimi i kulturës sportive dhe përfshirja e një numri më të madh qytetarësh në aktivitete sportive, harmonizimi me standardet dhe praktikat evropiane, mundësi dhe mbështetje të reja për atletët e rinj dhe promovimi i një stili jetese të shëndetshme dhe aktive", thuhet në deklaratë. U njoftua se në zbatimin e projektit do të marrin pjesë edhe bashkëpunëtorët e ministrit - Drejtori i Përgjithshëm i Drejtorisë për Rini Darko Stojanoviq, Këshilltari i Pavarur Boris Ivanoviq dhe Drejtoresha e Departamentit për Bashkëpunim Ndërkombëtar Ana Milaçiq. "Mali i Zi, përmes sportit dhe unitetit, vazhdon të bëjë hapa të fortë drejt integrimit evropian", thuhet në njoftim.

Raoniq, RTMZ është shtëpia e sporteve malazeze

Drejtori i Përgjithshëm i RTMZ, Boris Raoniq ka theksua se RTMZ është shtëpia e sporteve malazeze. "Në katër vitet e fundit, ne kemi siguruar transmetime të të gjitha garave përfaqësuese si dhe të ligave vendase. Në këtë mënyrë, u kemi mundësuar qytetarëve të Malit të Zi, pavarësisht sportit, të kenë mundësinë të ndjekin ekipet dhe klubet e tyre kombëtare në shërbimin publik. Ne transmetojmë gara kombëtare në futboll, basketboll, hendboll, volejboll, vaterpolo dhe shumë sporte të tjera, dhe RTMZ gjithashtu transmeton ngjarjet më të mëdha sportive në botë", tha Raoniq. Sa i përket fushëveprimit të sporteve kombëtare në program, sot nuk ka shërbim publik mediatik në Evropë që u jep më shumë hapësirë ​​sporteve kombëtare sesa RTMZ. Mesatarisht, kishim pothuajse tre transmetime ditore ose emisione sportive. Ai njofton se në periudhën e ardhshme, do të transmetojë gara të mëdha si Eurobasket, Kampionatin Botëror në Atletikë dhe Kampionatin Botëror për Femra në Hendboll, ku, siç thotë ai, do të kyçemi në simpatizimin për ekipet tona kombëtare së bashku me audiencën.

Deputetët s’e votojnë Hekuran Muratin për kryekuvendar

Partia fituese e zgjedhjeve, Lëvizja Vetëvendosje, propozoi Hekuran Muratin për postin e kryeparlamentarit, propozim që nuk mori mbështetjen e 61 deputetëve. Për të votuan 57 deputetë, 51 ishin kundër dhe gjashtë abstenuan. LVV-ja fajësoi partitë që mandatin e kaluar ishin në opozitë për bllokim të formimit të institucioneve, ndërkaq Partia Demokratike e Kosovës tha se LVV-ja e propozoi Muratin me qëllim që të zvarritet procesi. Para seancës, Aleanca për Ardhmërinë e Kosovës propozoi që partitë të konsultohen paraprakisht, para se të hidhet një emër për votim. Ndërkaq, nga Lidhja Demokratike insistuan se pa marrëveshje politike nuk mund të zgjidhet ngërçi politik. Pas seancës, Albulena Haxhiu nga LVV-ja tha se për kandidatin e ri do të dihet gjatë seancës së radhës, që do të mbahet më 24 gusht në orën 11:00.

Lista Serbe ankohet në PZAP për vendimin e KQZ-së

Lista Serbe ka dorëzuar në Panelin Zgjedhor për Ankesa dhe Parashtresa (PZAP) anekesën lidhur me vendimin e Komisionit Qendror të Zgjedhjeve për moscertifikimin e kësaj partie për zgjedhjet lokale të nëntorit. Më herët gjatë ditës, në një konferencë për media, kjo parti tha se moscertifikimi i saj, është “i paligjshëm dhe diskriminues” i kryeministrit në detyrë të Kosovës, Albin Kurti. Lista Serbe është partia më e madhe e serbëve në Kosovë që gëzon mbështetjen e Beogradit zyrtar. Kryetari i Listës Serbe, Zllatan Ellek, tha se megjithëse Zyra për partitë politike rekomandoi certifikimin, KQZ-ja vendosi që ta refuzonte këtë rekomandim. “Është e qartë se Kurti dhe anëtari i tij në KQZ, para së gjithash mendoj për Alban Krasniqin, bashkëshortin e [ministres në detyrë të Drejtësisë] Albulena Haxhiut, nuk mund t’ia falin Listës Serbe faktin që ajo nuk u zgjodh në pozitën e kryetares së Kuvendit të Kosovës”, tha ai. “Ky reagim i Albin Kurtit është, para së gjithash, për të fituar pikë të lira politike. Ne do të ndërmarrim të gjitha veprimet ligjore që janë të nevojshme, me qëllim që para së gjithash të sigurojmë certifikimin e të gjithë kandidatëve, si për kryetarë komunash, ashtu edhe për asamblistë”, shtoi Ellek.

Zelensky thotë se Rusia po jep sinjale se nuk dëshiron t’i japë fund luftës

Presidenti ukrainas, Volodymyr Zelensky, tha se sjellja e Rusisë pas samitit SHBA-Rusi javën e kaluar dhe bisedimeve të nivelit të lartë në Uashington me liderët evropianë është një sinjal se Moska nuk ka ndërmend të negociojë një marrëveshje paqeje për t’i dhënë fund luftës në Ukrainë. “Tani, sinjalet që po vijnë nga Rusia janë thjesht skandaloze”, tha Zelensky mbrëmjen e 21 gushtit, pasi Rusia përshkallëzoi sulmet ajrore. “Ata po përpiqen t’i shmangen mbajtjes së një takimi. Ata nuk duan ta përfundojnë këtë luftë”. Forcat Ajrore Ukrainase kanë raportu dje se Rusia lëshoi 574 dronë dhe 40 raketa në disa rajone, duke shkaktuar viktima në mesin e civilëve dhe duke dëmtuar rëndë zonat e banuara dhe infrastrukturën. Sipas autoriteteve ukrainase, sulmi ajror i Rusisë, më i madhi për këtë muaj, ndodhi disa ditë pasi presidenti amerikan Donald Trump priti Zelenskyn dhe udhëheqësit evropianë në përpjekje për të shtyrë përpara negociatat e paqes.

Katz - Qyteti i Gazës mund të shkatërrohet nëse Hamasi nuk pranon kushtet e Izraelit

Qyteti i Gazës mund të shkatërrohet nëse Hamasi nuk pranon kushtet e Izraelit, të cilat përfshijnë çarmatimin e plotë të grupit militant palestinez, paralajmëroi sot Ministri i Mbrojtjes Izraelite, Israel Katz. AP raporton se Katz e tha këtë ndërsa Izraeli përgatitet për një ofensivë të zgjeruar në zonë. Kryeministri izraelit Benjamin Netanyahu më parë tha se do të autorizonte ushtrinë të niste një operacion të madh për të pushtuar Qytetin e Gazës. Katz paralajmëroi se Qyteti i Gazës, i cili është më i madhi në enklavën palestineze të shkatërruar nga konflikti, mund të "shndërrohet në Rafah dhe Beit Hanoun" - zona të rrafshuara me tokë më parë gjatë luftës. "Portat e ferrit janë gati të hapen mbi kokat e vrasësve dhe përdhunuesve të Hamasit në Gaza - derisa ata të bien dakord me kushtet e Izraelit për t'i dhënë fund luftës", shkroi Katz në një postim në X Network.

Administrata e Trumpit po rishikon 55 milionë të huajt me viza amerikane

Administrata amerikane sot ka njoftua se po kontrollon mbi 55 milionë persona që posedojnë viza të vlefshme të SHBA-së, për çdo shkelje që mund të çojë në dëbim. Kjo është pjesë e masave gjithnjë e më të ashpra kundër të huajve që kanë leje qëndrimi në Shtetet e Bashkuara. Në një përgjigje me shkrim për Associated Press, Departamenti amerikan i Shtetit bëri të ditur se të gjithë personat me viza – përfshirë turistët e huaj – i nënshtrohen kontrollit të vazhdueshëm për të parë nëse kanë bërë diçka që i bën të papërshtatshëm për hyrje ose qëndrim në SHBA. Nëse gjenden të dhëna të tilla, viza do t’u hiqet, ndërsa nëse mbajtësi i vizës ndodhet brenda territorit amerikan, ai ose ajo do të dëbohet, tha DASH-i. Që kur presidenti amerikan, Donald Trump mori detyrën, administrata e tij është përqendruar në dëbimin e migrantëve që qëndrojnë ilegalisht në SHBA, por edhe të atyre me viza studentore apo me viza për programe shkëmbimi të studentëve.

Irani dhe fuqitë evropiane raportohet se do të diskutojnë për çështje bërthamore

Ministri i Jashtëm iranian, Abbas Araqchi, do të zhvillojë sot një bisedë të përbashkët telefonike me homologët e tij nga Franca, Britania dhe Gjermania për të diskutuar për bisedimet bërthamore dhe sanksionet, raportoi agjencia shtetërore iraniane e lajmeve, IRNA. Tre fuqitë evropiane kanë kërcënuar se do të aktivizojnë sanksionet e Kombeve të Bashkuara ndaj Iranit, në bazë të një mekanizmi për rivendosjen automatike të sanksioneve, nëse Irani nuk kthehet në tavolinën e negociatave për programin e tij bërthamor. Këto vende, së bashku me Shtetet e Bashkuara argumentojnë se Irani po e përdor programin e tij bërthamor që potencialisht të zhvillojë armë bërthamore. Irani mohon se synon të ketë armë bërthamore dhe argumenton se programi i tij ka qëllime paqësore. Teherani pezulloi negociatat me SHBA-në, që synonin frenimin e ambicieve bërthamore të Republikës Islamike, pasi Izraeli dhe SHBA-ja sulmuan ndërtesat bërthamore të Iranit në qershor. Izraeli dhe Irani zhvilluan luftë 12-ditore, që përfundoi me një armëpushim, pak pasi SHBA-ja përdori armë të fuqishme për të shënjestruar tre objekte bërthamore të Republikës Islamike. Që atëherë, inspektorët nga Agjencia Ndërkombëtare për Energji Bërthamore nuk kanë mundur që të kenë qasje në objektet bërthamore, pavarësisht se shefi i kësaj agjencie, Rafael Grossi, ka theksuar se inspektimet janë thelbësore.

Nesër mot i ndryshueshëm

Sot në jug të vendit mban mot kryesisht me diell kurse në viset tjera mot kryesisht i vranët. Frynë erë e mesme deri e fortë nga drejtimi i jugut. Tempartaurat në orën 14: H.Novi 31 gradë, Ulqin 30, Budvë 29, Podgoricë e Tivar 28, Nikshiq e Andrievicë 23, Plevle, Kollashin e B.Pole 22, Zhablak e Rozhajë 19 dhe në Shavnik 18 gc.
Për nesër metereologët parashohin mot me vranësira të ndryshueshme, intervale me diell dhe mundësi të reshjeve të dobëta të shiut. Do të fryjë erë e dobët deri e mesme e vende vende deri e fortë nga drejtimi i veriut. Temperatura e mëngjesit do të sillet prej 10 deri në 22, kurse më e larta e ditës prej 18 deri në 30 gc.