Ditari 18.09.2025

Ditarin e përgatiti, Violeta Gjokaj

KËSHILLI PARLAMENTAR I BASHKIMIT EVROPIAN DHE MALIT TË ZI PËR STABILIZIM DHE ASOCIIM, PËRSHËNDET HAPAT VENDIMTARË QË AUTORITETET MALAZEZE

Këshilli Parlamentar i Bashkimit Evropian dhe Malit të Zi për Stabilizim dhe Asociim, në projekt-deklaratën dhe rekomandimet e tij, përshëndet hapat vendimtarë që autoritetet malazeze kanë ndërmarrë në luftën kundër krimit të organizuar dhe korrupsionit, si dhe vullnetin politik të shprehur qartë që kjo luftë të zhvillohet në mënyrë të vazhdueshme, gjithëpërfshirëse dhe pa përjashtime. Në projekt-dokument, në të cilin ka pasur qasje Portali i Radiotelevizionit të Malit të Zi, Këshilli përshëndet përkushtimin e vazhdueshëm dhe ambicien e Malit të Zi për të mbyllur kapitujt e mbetur të negociatave gjatë viteve 2025 dhe 2026, me qëllim që të bëhet anëtarja e radhës e Bashkimit Evropian. Këshilli Parlamentar për Stabilizim dhe Asociim, si organ i përbashkët i Parlamentit të Malit të Zi dhe Parlamentit Evropian, do të mbajë mbledhjen sot dhe nesër në Kuvendin e Malit të Zi, pas së cilës do të miratohet deklarata me rekomandime. Gjatë takimit dyditor, deputetët e Malit të Zi dhe ata evropianë diskutojnë mbi përparimin në fushën e sundimit të ligjit, me fokus te procesi i vetingut dhe lufta kundër krimit të organizuar dhe korrupsionit, pastaj mbi përparimin në reformën e legjislacionit zgjedhor, si dhe për bujqësinë, zhvillimin rural dhe turizmin e qëndrueshëm.

IVANOVIQ: MALI I ZI ËSHTË I VENDOSUR TË PËRFUNDOJË NEGOCIATAT DERI NË VITIN 2026

Nënkryetari i Qeverisë  për Çështjet e Jashtme dhe Evropiane, Filip Ivanoviq, u takua në Podgoricë me anëtarët e delegacionit të Parlamentit Evropian të kryesuar nga Kryetari i Komitetit Parlamentar për Stabilizim dhe Asociim, Tomas Wejc, duke treguar se Mali i Zi është i vendosur të përfundojë negociatat me BE-në deri në vitin 2026. "Gjatë takimit, bashkëbiseduesit patën një dialog të hapur dhe konstruktiv rreth gjendjes aktuale dhe perspektivave të integrimit evropian të Malit të Zi, me referencë të veçantë reformave kyçe në fushat e sundimit të ligjit, pavarësisë dhe efikasitetit të gjyqësorit, luftës kundër korrupsionit dhe krimit të organizuar, si dhe progresit në mbylljen e kapitujve të negociatave. Nënkryetari Ivanoviq theksoi se Mali i Zi është i vendosur të përfundojë negociatat deri në vitin 2026 dhe të jetë gati për anëtarësim deri në vitin 2028, që është prioriteti më i lartë kombëtar, i mbështetur nga mbështetja jashtëzakonisht e lartë publike", thuhet në njoftim. Ai theksoi se sundimi i ligjit është themeli i së ardhmes evropiane të Malit të Zi dhe se Qeveria është vazhdimisht e angazhuar në forcimin e qëndrueshmërisë institucionale, transparencës dhe përgjegjësisë, siç konfirmohet nga hapi i rëndësishëm përpara në mbylljen e përkohshme të Kapitullit 5, i cili i përket grupit të të drejtave themelore. Bashkëbiseduesit ranë dakord se dialogu intensiv politik, bashkëpunimi ndërinstitucional dhe mbështetja teknike e Parlamentit Evropian janë çelësi për ruajtjen e momentit të reformave dhe arritjen e qëllimeve ambicioze të Malit të Zi në rrugën evropiane. 

KABINETI I PRESIDENTIT TË MALIT TË ZI: RËNDËSIA E RUAJTJES SË PAVARËSISË SË PLOTË  TË BANKËS QENDRORE

Vendimi i Kuvendit për të mos mbështetur propozimet e guvernatores së Bankës Qendrore, Irena Radoviq, për zëvendësit e saj, cenon seriozisht besueshmërinë e këtij institucioni, hap rrugë për presione politike dhe rrezikon të dobësojë perspektivën evropiane të Malit të Zi, thuhet në një njoftim nga kabineti i presidentit të Malit të Zi.

Ata rikujtojnë se Banka Qendrore, ashtu si edhe Gjykata Kushtetuese, është institucion i pavarur dhe se për këtë arsye Kushtetuta ka paraparë që presidenti i shtetit të propozojë guvernatorin – me qëllim që ky institucion të mbrohet nga pazaret dhe presionet politike. Në të njëjtën mënyrë, guvernatorja e Bankës Qendrore ka të drejtë sovrane të propozojë zëvendësguvernatorët, në bazë të ekspertizës dhe kualifikimeve profesionale, e jo për shkak të përshtatshmërisë politike, thuhet nga kabineti i Millatoviqit. Ata theksojnë se Parlamenti duhet të sigurojë një përzgjedhje transparente të anëtarëve të Këshillit të Bankës Qendrore, mbi bazën e kompetencave profesionale dhe në përputhje me Ligjin

VUKOVIQ-KUC: BLLOKADA E GJYKATËS KUSHTETUESE I KONVENON SHUMICËS NË PUSHTET

Bllokada e Gjykatës Kushtetuese i konvenon shumicës në pushtet, thotë deputetja e Partisë Demokratike e Socialistëve, Aleksandra Vukoviq- Kuç. Ajo e tha këtë, pasi të hënën, në seancën e jashtëzakonshme të Kuvendit, nuk u shqyrtua propozimi i presidentit Jakov Millatoviq që Mirjana Vuçiniq të zgjidhet gjyqtare e Gjykatës Kushtetuese. Ndërkaq, lidhur me projektin e ndërtimit të kolektorit në Botun, deputetja e PDS-së, vlerësoi se ky është një shembull që tregon papërgjegjshmërinë e shumicës në pushtet. Mosndërtimi i këtij impianti do të ketë pasoja të pallogaritshme, jo vetëm për buxhetin e Kryeqytetit, por edhe për perspektivën evropiane të Malit të Zi, theksoi Vukoviq-Kuç për emisionin e Mëngjesit të Televizionit të Malit të Zi.

VUKOVIQ: MESAZHET NGA BRUKSELI TREGOJNË SE QEVERIA PO BËN VETËM SIKUR PO BËN SIKUR ËSHTË E PËRKUSHTUAR NDAJ INTEGRIMIT NË BE

Nënkryetari i PDS-së dhe deputeti në Parlamentin e Malit të Zi, Ivan Vukoviq, thekson se pothuajse çdo ditë vijnë mesazhe nga Brukseli që tregojnë se sa shumë koalicioni qeverisës vetëm pretendon të punojë në procesin e integrimit të vendit në Bashkimin Evropian. “Pothuajse çdo ditë, nga Brukseli vijnë mesazhe që konfirmojnë shkallën në të cilën koalicioni qeverisës po pretendon të jetë i përkushtuar ndaj procesit të integrimit në BE. Po kryhet puna teknike, e cila nuk i kushton askujt politikisht. Vendimet thelbësore për shtetin po shtyhen dhe praktikat autoritare po bëhen gjithnjë e më të dukshme”, tha Vukoviq në rrjetin X.

GJEKA - BARANZINI: BASHKËPUNIMI ME OKB-NË ËSHTË NJË PARTNERITET NË TË GJITHA SEGMENTET

Ministri i të Drejtave të Njeriut dhe të Pakicave, Fatmir Gjeka, u takua me Caroline Tissot Baranzini, koordinatoren e re rezidente të Kombeve të Bashkuara në Mal të Zi, u njoftua nga ky departament. Ministri Gjeka falënderoi për mbështetjen e vazhdueshme të Sistemit të OKB-së në vend, duke thënë se bashkëpunimi është një partneritet në të gjitha segmentet. Siç u tha, ai e prezantoi koordinatoren  rezident të OKB-së në Mal të Zi me aktivitetet në të cilat po punon aktualisht Ministria e të Drejtave të Njeriut dhe të Pakicave, në një nivel normativ dhe strategjik, dhe theksoi dinamikën e punës së ministrisë për hartimin e një ligji të ri për Mbrojtësin e të Drejtave dhe Lirive të Njeriut të Malit të Zi, duke vënë në dukje se Projektligji do t'i dërgohet edhe Komisionit Evropian për mendimin e tij. "Ministria e të Drejtave të Njeriut dhe të Pakicave do të koordinojë procesin e formimit të Mekanizmit Kombëtar për raportimin, zbatimin dhe monitorimin e rekomandimeve të organeve të traktateve të OKB-së", njoftoi Gjeka. Ai theksoi se Ministria e të Drejtave të Njeriut dhe të Pakicave, pas tre vitesh pune të përkushtuar, pothuajse dy prej të cilave u shpenzuan në komunikim me Komisionin Evropian në lidhje me harmonizimin me standardet ndërkombëtare dhe aktin ligjore evropiane, më në fund miratoi Projektligjin për Mbrojtjen e Barazisë dhe Ndalimin e Diskriminimit, i cili përcakton mbrojtjen e të drejtave të njeriut në mënyrën më gjithëpërfshirëse. Ministria deklaron se koordinatorja rezidente e OKB-së përshëndeti ratifikimin e shumicës së instrumenteve të Kombeve të Bashkuara për të drejtat e njeriut nga Mali i Zi dhe theksoi rëndësinë e zbatimit të tyre, dhe se ajo shprehu mirënjohjen e saj ndaj ministres për mbështetjen e mekanizmit kombëtar që do të ndihmojë në zbatim, por edhe në raportimin para organeve të të drejtave të njeriut të OKB-së dhe ndjekjen e rekomandimeve të OKB-së, si dhe konsultimet e ardhshme mbi atë mekanizëm.

GJELAJ: NDËRMARRJA PUBLIKE “DEPONIA” NUK KA MARRË PËLQIMIN E KOMUNËS SË TUZIT

Kryetari i Komunës së Tuzit, Lindon Gjelaj, deklaroi sot se Ndërmarrja Publike “Deponia” nuk ka marrë pëlqimin e kësaj komune për të ndërtuar vaskë të re sanitare në deponinë Livade. Ai u bëri thirrje drejtuesve të kësaj ndërmarrjeje që të ndalojnë menjëherë ndërtimin e paligjshëm, përndryshe, siç tha, do të ndërmerren të gjitha procedurat ligjore, përfshirë paraqitjen e kallëzimeve penale dhe njoftimin e institucioneve ndërkombëtare. Siç shpjegoi ai, deponia “Livade” ndodhet në territorin e Komunës së Tuzit, dhe çdo veprim që rrezikon banorët e Tuzit, shëndetin e tyre dhe mjedisin, përbën një sulm të drejtpërdrejtë ndaj komunitetit të tyre. Shkatërrimi i hapësirës përreth deponisë, jashtë mureve të saj, është plotësisht i papranueshëm dhe kërkon reagim të menjëhershëm. Kam marrë edhe një premtim gojor nga drejtori i Deponisë se një praktikë e tillë do të ndalet, por është e qartë se këto premtime nuk janë zbatuar. Komuna e Tuzit nuk do të tolerojë më mashtrime dhe injorimin e interesave të qytetarëve tanë, theksoi Gjelaj.

NDODH PËR HERË TË PARË, PROGRAMI DHE PËRBËRJA E QEVERISË MIRATOHET ME 82 VOTA PRO. SEANCA ZGJAT VETËM 25 MINUTA

Kuvendi i Shqipërisë ka miratuar programin e qeverisë dhe përbërjen e Këshillit të Ministrave me 82 vota pro, 0 kundër dhe 0 abstenim. Një seancë e parashikuar maratonë, ku do të flisnin të 140 deputetët me nga 10 minuta që pritej të përfundonte të premten, ka zgjatur në fakt 25 minuta. Kryetari i Kuvendit, Niko Peleshi, pranoi një propozim të kreut të grupit parlamentar socialist, Taulant Balla dhe kaloi direkt në votim programin e qeverisë dhe përbërjen e kabinetit të Këshillit të Ministrave.Me 82 vota pro dhe asnjë kundër për shkak se deputetët e opozitës të revoltuar nga fjala që mbajti “Diella” në Kuvend, nuk morën pjesë në votim, u miratua edhe programi qeveritar. Tensionet e opozitës ku nuk munguan as hedhjet e librave të Kushtetutës dhe Rregullores së Kuvendit në drejtim të kryeministrit, erdhën për shkak se në nisje të fjalës së tij, kryeministri Rama paraqiti edhe një video disa-minutëshe ku shfaqej Diella e cila mbante një fjalim. Sipas demokratëve kjo ishte e papranueshme, teksa disa prej tyre iu afruan foltores ku fliste Rama, ndërkohë që gardistët iu dolën përballë. Një ndërprerje e shkurtër 5-minutëshe nuk e qetësoi situatën, duke bërë që Niko Peleshi të fuste Kuvendin në procedurë votimi ku u miratua edhe programi qeveritar për katër vitet e ardhshme.

POLICIA GJEN ARMË NË VERI, DYSHOHET SE ISHIN TË NJË PERSONI QË KËRKOHET PËR BANJSKËN

Policia e Kosovës tha se gjatë një kontrolli në veriun e Kosovës ka gjetur pajisje ushtarake, që tha se dyshohet se i përkasin një personi që kërkohet për sulmin në Banjskë. Sipas policisë, mëngjesin e 18 shtatorit, njësia e hetimeve Stacionit Policor Zveçan ka hasur në një rimorkio ku gjeti “dy thasë me uniforma, jelekë antiplumbë, pesë karikatorë të AK-47 me municion dhe pajisje tjera ushtarake”.Po ashtu janë konfiskuar rroba të tjera ushtarake, përfshirë edhe një uniformë kamofluese.“Nuk ka persona të arrestuar dhe dyshohet se këto armë i përkisnin një personi të dyshimtë, i cili tashmë është në kërkim për rastin Banjska”, tha Policia, duke shtuar se ky rast është nën hetim.Më 24 shtator 2023 në Banjskë të Zveçanit, një grup i serbëve të armatosur sulmoi Policinë e Kosovës, duke vrarë një rreshter. Gjatë këmbimit të zjarrit u vranë edhe tre sulmues serbë.Përgjegjësinë për sulmin e ka marrë Millan Radoiçiq, ish-nënkryetar i Listës Serbe, partisë kryesore të serbëve në Kosovë që gëzon mbështetjen e Beogradit. Kosova fajëson Serbinë, por Beogradi mohon se ka gisht në të. Autoritetet në Kosovë kanë ngritur aktakuzë për këtë rast. Aktualisht, gjykimi po zhvillohet ndaj tre të akuzuarve. Ndërkaq, Radoiçiq dhe 41 të tjerë të akuzuar për këtë rast ndodhen në arrati.

WILLIAMS: THAÇI DHE DELEGACIONI I KOSOVËS NË RAMBUJE KËRKONIN PAVARËSI

Dëshmitari i dytë i mbrojtjes së Hashim Thaçit, në Gjykatën Speciale në Hagë, Paul Uilliams deklaroi se delegacioni i Kosovës në  Rambuje me vet Hashim Thacin  kërkoi pavarësi. Hashim Thaci  dhe do të thoja të gjithë anëtarët  e delegacionit  shqiptar në Kosovë  dhe ekspertët e tyre kosovar , shqiptarë . kërkonin pavarësi , tha Uilliams. Ai tha se i ka treguar  delegacionit rrugën drejt pavarësisë. Pavarësia ishte e domosdoshme. Ka kaluar shumë kohë duke u shpjeguar rrugën se si mund të arrinin pavarësinë  në qoftë se  fjala pavarësi  nuk shkruhej në marrëveshjen e Rambujesë, shtoi ai. Uilliams më tej theksoi shkollimin e Thacit  në Zvicër , duke potencuar se ai ka pasur kulturë të sjelljes.

NGA VALA E RE E SULMEVE AJRORE DHE TOKËSORE NË RRIPIN E GAZËS, , JANË SHKAKTUAR DHJETËRA VIKTIMA MES CIVILËVE PALESTINEZË 

Ushtria izraelite ka hyrë në pjesët qendrore të Gazës, ndërsa qindra mijëra palestinezë po përpiqen të shpëtojnë nga lufta duke u larguar drejt jugut të kësaj enklave. Nga vala e re e sulmeve ajrore dhe tokësore në Rripin e Gazës, me ç’rast jenë goditur zonat përreth spitaleve ende funksionale, janë shkaktuar dhjetëra viktima mes civilëve palestinezë. Sipas burimeve shëndetësore palestineze, të paktën 83 palestinezë janë vrarë vetëm gjatë ditës së sotme. Ushtria izraelite bëri me dije se kishte goditur më shumë se 150 objektiva në të gjithë qytetin e Gazës brenda dy ditësh në mbështetje të forcave të saj tokësore. Izraeli thotë se qëllimi i tij është të lirojë pengjet dhe të mposhtë deri në 3 mijë luftëtarë të Hamasit në atë që e përshkruan si “bastioni i fundit” i grupit, por ofensiva ka marrë dënim të gjerë ndërkombëtar duke thënë se “situata çnjerëzore në Gaza është e papranueshme. Këshilli i Sigurimit pritet të votojë përsëri sot për një projektrezolutë që bën thirrje për armëpushim dhe akses humanitar në Rripin e Gazës, e cila mbështetet nga shumica e shteteve anëtare.

GREVA DHE PROTESTA TRONDITIN FRANCËN

Protesta dhe greva transporti paralizojnë Francën, duke penguar metronë e Parisit dhe trafikun në shumë qytete, ndërsa mijëra qytetarë përballen me qeverinë e presidentit Emmanuel Macron për shkak të planit për të shkurtuar financimet e shërbimeve publike që mbajnë modelin tradicional francez të jetesës. Policia përdori gaz lotsjellës para agimit gjatë përleshjeve me protestuesit në Paris, ndërsa në gjithë Francën u mbajtën demonstrata ku pritej pjesëmarrja e qindra mijëra qytetarëve për të protestuar kundër varfërisë në rritje, pabarazisë dhe vështirësive ekonomike që përballen punëtorët me paga të ulëta. “Ne i themi ‘jo’ qeverisë. Na ka ardhur në majë të hundës. Nuk ka më para, kosto e jetesës është e lartë,” tha punëtorja e transportit në grevë, Nadia Belhoum, në një protestë para-agimi që kishte në shënjestër një depo autobusësh në Paris. Ajo përshkroi “njerëz që agonizojnë, shtrydhen si limon edhe kur s’ka më lëng”, raporton AP.Sindikatat kërkojnë anulimin e shkurtimeve buxhetore, ngrirjes së përfitimeve sociale dhe masave të tjera shtrënguese, duke paralajmëruar se këto do të godasin më shumë punëtorët me paga të ulëta dhe klasën e mesme, në të kundërtën do të veprojnë si më parë, ashtu siç kanë rrëzuar qeveri të tjera që tentuan masa kursim.

NESËR MOT KRYESISHT ME DIELL

Në Mal të Zi mban mot kryesisht me diell. Frynë erë, vende-vende mesatare deri e fortë nga drejtimet e veriut. Temperaturat e shënuara në orën 14: Tivar, H.Novi, Ulqin e Budvë 28, Podgoricë 27, Cetinë 23, Nikshiq e Rozhajë 22, Beranë 21, Shavnik, Andrievicë e Guci 20, Plevle, Plluzhinë e Petnjicë 19, Kollashin 18 dhe në Zhablak 14 gradë. Për nesër parashihet të mbaj mot kryesisht me diell dhe i ngrohtë. Do të fryjë erë, vende-vende mesatare nga drejtimet veriore. Temperatura e mëngjesit prej 5 deri në 19, kurse më e larta e ditës prej 19 deri në 31 gradë.