Ditari 30.10.2025

Ditarin e përgatiti, Violeta Gjokaj

PARLAMENTI: ORA E KRYEMINISTRIT

Në Parlament sot u mbajt ora e kryeministrit. Duke iu përgjigjur pyetjeve të deputetëve, kryeministri Millojko Spajiq tha se kjo gjeneratë politikanësh mund të mbyllë të gjitha kapitujt në negociatat me BE-në deri në fund të vitit 2026, të ngrejë ekonominë nga hiçi dhe të forcojë sundimin e ligjit.

Sipas tij vendi duhet të përkushtohet rreth tri gjërave – agjendës evropiane, sundimit të ligjit dhe rritjes ekonomike.
Kryeministri theksoi se kurrë nuk do të ndikojë në degët e tjera të pushtetit, as nuk do të komentojë vendimet e gjyqësorit dhe prokurorisë.
Në fillim të seancës, zëvendëskryetari i parlamentit, Mirsad Nurkoviq, dënoi kërcënimet ndaj reisit të Bashkësisë Islame, Rifatu Fejziq. Ai tha se askush nuk ka të drejtë të kërcënojë. Edhe Zëvendëskryeministri Aleksa Beçiq dënoi të gjitha format e kërcënimit dhe dhunës.

DËNOHEN KËRCËNIMET KUNDËR KREUT TË BASHKËSISË ISLAME NË MAL TË ZI, RIFAT FEJZIQ

Nënkryetari i qeverisë, Ervin Ibrahimoviq dënoi kërcënimet kundër kreut të Bashkësisë Islame në Mal të Zi, Rifat Fejziq. Ai tha se do të përdorën të gjitha mekanizmat brenda institucioneve për të përcaktuar se kush qëndron pas përpjekjes për të destabilizuar Malin e Zi në fund të procesit të integrimit evropian.
Kërcënimet ndaj Reisit Fejziq u dënuan edhe nga Ministri i Administratës Publike Marash Dukaj. Ai deklaron se të gjithë jemi të detyruar të punojmë për të shtypur in-tolerancën në rritje, ndërsa pohon se stigmatizimi mund të ndalet vetëm nga një sistem i fortë institucionesh që do të identifikojnë dhe procedojnë përgjegjësinë individuale
Ngjarjet e fundit i ka dënuar edhe Ministria për të Drejtat e Njeriut dhe Pakicave.

LEKIQ: INCIDENTET JANË NJË ARSYE PËR SHQETËSIM SERIOZ

Ish-diplomati, Miodrag Lekiq, thotë se ngjarjet e fundit në lidhje me shtetasit turq në Mal të Zi janë rezultat i një politike që ka lënë pas dore procesin e emigrimit në vend.
Ai thekson se incidentet janë një arsye për shqetësim serioz dhe për ri-definim të politikave.

MILLATOVIQ: ME FRANCËN, MALI I ZI ËSHTË MË AFËR ANËTARËSIMIT NË BASHKIMIN EVROPIAN

Vendimi i Qeverisë për të hequr përkohësisht regjimin pa viza për qytetarët turq hyn në fuqi sot. Kryeministri Millojko Spajiq theksoi se vendimi u mor me qëllim ruajtjen e stabilitetit dhe sigurisë, duke vënë në dukje se Qeveria do të vazhdojë të punojë për të ruajtur marrëdhënie të mira me Ankaranë.
Qeveria e Malit të Zi ka miratuar një vendim për të pezulluar përkohësisht regjimin pa viza për qytetarët e Republikës së Turqisë.
Vendimi u mor bazuar në pëlqimin e marrë nga shumica e anëtarëve.
Kjo masë e përkohshme miratohet me qëllim shqyrtimin dhe përmirësimin e mekanizmave për kontrollin e lëvizjes dhe qëndrimit të qytetarëve turq.
Heqja e regjimit pa viza u njoftua më parë nga Kryeministri Millojko Spajiq, pasi pothuajse 50 qytetarë turq dhe azerbajxhanas u ndaluan në Podgoricë me qëllim verifikimin e ligjshmërisë së qëndrimit të tyre.

KËSHILLI ADMINISTRATIV: MIRATOHET KËRKESA PËR HEQJEN E IMUNITETIT TË MILLAN LEKIQ

Në seancën e Këshillit Administrativ, kërkesa për heqjen e imunitetit të deputetit të Demokracisë së Re Serbe, Millan Lekiq, u miratua unanimisht.
Këshilli Administrativ shqyrtoi kërkesën e Gjykatës Themelore në Plevle për dhënien e miratimit për të zhvilluar procedurë penale kundër Millan Lekiq për rrezikim të trafikut publik.

MASA E PARABURGIMIT DERI NË 30 DITË PËR BIZNESMENIN UBOVIQ DHE PARTNERIN E TIJ NË BIZNES KOVAÇEVIQ

Gjyqtarja hetuese e Gjykatës së Lartë në Podgoricë, Suzana Mugosha, caktoi masën e paraburgimit deri në 30 ditë për biznesmenin Ranko Uboviq dhe partnerin e tij në biznes Veselin Kovaçeviq.
Gjyqtarja mori vendimin dy orë pas mesnatës, pas të cilit Uboviq dhe Kovaçeviq u dërguan në qendrën e paraburgimit në Spuzh. Avokati i tyre, Zoran Piperoviq, tha se Uboviq u ndalua për shkak të rrezikut të ndikimit te dëshmitarët, kurse Kovaçeviq për shkak të rrezikut të arratisjes. Prokuroria speciale i akuzon ata për pastrim parash.

PSSH: Arrestohen disa persona

Disa persona u arrestuan me urdhër të Prokurorisë Speciale të Shtetit. Oficerët e Departamentit Special të Policisë kryen arrestime në disa qytete. Urdhër-arreste u lëshuan për shkak të krijimit të organizatave kriminale dhe kontrabandë droge, dhe të arrestuarit dyshohet se janë anëtarë të organizatave kriminale.

GJELOSHAJ: CEFTA MBETET NJË PARTNER I FORTË NË NXITJEN E INTEGRIMIT EKONOMIK RAJONAL

Zëvendëskryeministri për Politika Ekonomike dhe Ministri i Zhvillimit Ekonomik, Nik Gjeloshaj, zhvilloi një takim konstruktiv me Drejtoreshën e Sekretariatit të CEFTA-s, Pranvera Kastrati.

Siç u tha nga Ministria e Zhvillimit Ekonomik, në takim u shpreh mbështetja e ndërsjellë për vizionin e përbashkët të përmirësimit të bashkëpunimit ekonomik rajonal dhe thjeshtimit të procedurave në tregtinë e mallrave dhe shërbimeve.

Ata theksojnë se u diskutua progresi në fushën e dixhitalizimit të procedurave tregtare.

"Theks i veçantë u vu në rëndësinë e sinergjisë midis bashkëpunimit rajonal dhe axhendës evropiane të Malit të Zi, brenda kornizës së Planit të Rritjes për Ballkanin Perëndimor, si një instrument kyç për konvergjencë më të shpejtë ekonomike dhe forcimin e konkurrueshmërisë në treg", thanë ata në një deklaratë.
Ata shtojnë se pas pothuajse dy dekadash ekzistencë, CEFTA mbetet një kornizë e besueshme dhe një partner i fortë në inkurajimin e integrimit ekonomik rajonal, zhvillimit të përbashkët dhe përafrimit me standardet evropiane.

MINISTRIA KA LËSHUAR NJË LEJE NDËRTIMI PËR NDËRTIMIN E NJË KOLEKTORI NË BOTUN

Ministria e Planifikimit Hapësinor, Urbanizmit dhe Pronës Shtetërore ka lëshuar një leje ndërtimi për ndërtimin e një impianti për trajtimin e ujërave të zeza në Botun. Kjo u konfirmua për RTMZ.
Vendimi mbi kërkesën për leje ndërtimi u njoftua javën e kaluar nga ministri përkatës, Sllaven Radunoviq, në një emisionin në TVMZ.

Ministri, tha se dokumentacioni për kolektorin në Botun është mbledhur dhe, siç theksoi ai, pas lëshimeve të vogla që u kthyen për korrigjim, nuk do të ketë asnjë arsye të vetme që palët ligjore të mos lëshojnë një leje ndërtimi.

Radunoviq theksoi se qytetarët e Botunit, Zeta duhet ta dinë se kolektori nuk do ta zgjidhë problemin e baltës së kuqe, por do ta zgjidhë problemin që kanë me ndotjen e lumit Moraça në fshatin e tyre dhe me ujërat nëntokësore, të cilat, siç thotë ai, janë plotësisht të papërdorshme.

Ai beson se qyteti i Podgoricës duhet t'u ofrojë atyre një rrugëdalje nga kjo situatë, dhe shpëtimi i vetëm, siç tha ai, është të largohen nga ajo zonë, e cila është kaq e ndotur.
Kryeqyteti dhe Kompania e Ujësjellësit dhe Kanalizimeve aplikuan së bashku për leje ndërtimi për ndërtimin e një kolektori në Botun.

Ndërtimi i kolektorit kundërshtohet nga banorët e Botunit, Komuna e Zetës dhe Partia Demokratike Popullore e Millan Knezheviq.

MILLATOVIQ: ME FRANCËN, MALI I ZI ËSHTË MË AFËR ANËTARËSIMIT NË BASHKIMIN EVROPIAN

Në një pritje të organizuar nga Presidenti Francez Emmanuel Macron dhe bashkëshortja e tij në Pallatin Elysee, Presidenti Malazez Jakov Millatoviq tha se Mali i Zi mbetet i përkushtuar në rrugën evropiane dhe se mbështetja e Francës është me rëndësi të madhe.
Gjatë takimit, Presidenti Macron theksoi mbështetjen e fortë të Francës për rrugën e Malit të Zi drejt anëtarësimit në Bashkimin Evropian, duke theksuar se Franca mbetet një partnere e besueshme dhe aleate e vërtetë në arritjen e këtij qëllimi.

Siç thuhet në deklaratë, Millatoviq tha se Mali i Zi mbetet i përkushtuar në rrugën evropiane dhe se mbështetja e Francës është me rëndësi të madhe.

"Franca është një zë i fortë mbështetjeje për Malin e Zi dhe një partner i rëndësishëm në një kohë kur duam të përshpejtojmë proceset e reformave dhe të konfirmojmë se Mali i Zi mund të jetë anëtari i parë i Bashkimit Evropian deri në vitin 2028", tha Presidenti Millatoviq.

Të dy presidentët ranë dakord për vizitën e Presidentit Macron në Mal të Zi vitin e ardhshëm, e cila do të jetë edhe vizita e parë zyrtare nga një president francez në vendin tonë.

Presidenti Macron do të marrë pjesë gjithashtu në Samitin BE-Ballkani Perëndimor, i cili do të organizohet në Mal të Zi më 1 qershor të vitit të ardhshëm, kur Presidenti Millatoviq do të presë të gjithë udhëheqësit e BE-së në këtë ngjarje historike për Malin e Zi.

OSMANI I THËRRET LIDERËT E PARTIVE POLITIKE NË TAKIM TË PREMTEN

Presidentja Vjosa Osmani i ka thirrur kryetarët e partive politike në një takim nesër në mesditë, teksa Kosova vazhdon përpjekjet për formimin e një qeverie të re gati nëntë muaj pas mbajtjes së zgjedhjeve.
Bekim Kupina, këshilltari i Osmanit, tha për Radion Evropa e Lirë të enjten se takimi do të mbahet nesër në orën 12:00.
Osmani pritej t’i ftonte ata për takim konsultativ, pasi i mandatuari i parë nga ajo, Albin Kurti i partisë fituese Lëvizja Vetëvendosje, dështoi t'i fitonte votat e mjaftueshme në Kuvend të dielën për ta zgjedhur qeverinë e re.
Ajo duhet ta caktojë një mandatar tjetër për formimin e qeverisë brenda 10 ditësh nga dështimi i mandatarit të parë, sipas Kushtetutës.
Megjithatë, nuk është e qartë nëse do të caktohet një mandatar i ri, për shkak të mungesës së vullnetit nga partitë për të arritur ndonjë koalicion qeverisës.

KE: MASAT HIQEN, NËSE NË VERI ARRIHET TRANSFER I RREGULLT I QEVERISJES

Komisioni Evropian ka qëllim të heqë më tej masat financiare ndaj Kosovës, nëse pas raundit të dytë të zgjedhjeve lokale, në veri arrihet një transfer i rregullt i qeverisjes dhe deeskalimi mbetet i qëndrueshëm. Kjo thuhet në draft-raportin e progresit për Kosovën, të cilin Komisioni Evropian pritet ta publikojë më 4 nëntor.
Sipas burimeve diplomatike, kjo nënkupton bartje të qetë të pushtetit dhe marrje të detyrës nga kryetarët e rinj të komunave në veri.
Raporti i progresit, dokumenti më i rëndësishëm që përpilon Komisioni Evropian për vendet e zgjerimit, në rastin e Kosovës nuk evidenton përparime të rëndësishme. Përkundrazi, ai konstaton progres të kufizuar apo përparim të pjesshëm në shumicën e fushave – vlerësime që konsiderohen përgjithësisht të ulëta.
Sa i përket situatës në veri, raporti kritikon veprimet e autoriteteve të Kosovës, të cilat, siç thuhet, kanë qenë në kundërshtim me obligimet e vendit ndaj Bashkimit Evropian dhe me procesin e normalizimit të marrëdhënieve me Serbinë, raporton RTK.
Sipas gjetjeve të dokumentit, dialogu ka qenë i penguar për shkak të situatës politike si në Kosovë, ashtu edhe në Serbi. Në këtë kuadër përmendet se Serbia nuk ka ndërmarrë masa ndaj autorëve të sulmit në Banjskë, ngjarje që ka shënuar përshkallëzimin më të madh të sigurisë.

KURTI NË FORUMIN E PAQES NË PARIS: KOSOVA, HISTORI E DYFISHTË SUKSESI

Kryeministri në detyrë i Republikës së Kosovës, Albin Kurti, ishte i ftuari kryesor në panelin “Paqeruajtja në një udhëkryq: E ardhmja e misioneve të OKB-së dhe përgjegjësia globale”, organizuar në kuadër të Forumit të Paqes që po mbahet në Paris.
Në fjalën e tij, kryeministri Kurti theksoi se Kosova përfaqëson një histori të dyfishtë suksesi: së pari, si shembull i një ndërhyrjeje të suksesshme ushtarake dhe humanitare të NATO-s që ndali gjenocidin e Serbisë, dhe së dyti, si një shtet ku zhvillimi dhe demokracia ecin krah për krah.
Ai nënvizoi se me forcimin e institucioneve shtetërore është ulur nevoja për prezencë ushtarake ndërkombëtare, ndërkohë që vendi ka shënuar rritje të qëndrueshme ekonomike.
Siç njofton Kryeministria, Kurti ka deklaruar se çdo mision paqeruajtës kërkon vlera të përbashkëta dhe jo vetëm interesa të përbashkëta, duke vënë theksin tek rëndësia e multilateralizmit, dialogut dhe marrëveshjeve.
Në vijim, gjatë pyetjeve nga audienca, Kryeministri Kurti foli për forcimin e subjektivitetit ndërkombëtar të Kosovës, përfshirë tri njohjet e reja gjatë këtij viti, si dhe për aspiratat e vendit për integrim në Bashkimin Evropian dhe NATO, në përputhje me rëndësinë e bashkëpunimit rajonal.

TRAMP KA URDHËRUAR SOT USHTRINË AMERIKANE TA RIFILLOJË MENJËHERË TESTIMIN E ARMËVE BËRTHAMORE

Presidenti i Shteteve të Bashkuara, Donalld Tramp, e ka urdhëruar sot ushtrinë amerikane ta rifillojë menjëherë testimin e armëve bërthamore, pas një ndërprerjeje 33 vjeçare. Tramp e bëri këtë njoftim të papritur në rrjetin e Truth Social derisa po udhëtonte në helikopterin presidencial për tu takuar me liderin e Kinës, XI Jinping, në Busan të Koresë së jugut. Ai tha se e kishte urdhëruar Pentagonin ta testojë arsenalin bërthamor të SHBA-së “në shkallë të barabartë” me fuqitë e tjera bërthamore.

PRESIDENTI TRUMP THA SE PRET ARRITJEN E NJË MARRËVESHJEJE KUR TË TAKOHET ME LIDERIN E KINËS, XI JINPING, NË KORENË E JUGUT

Presidenti i Shteteve të Bashkuara, Donald Trump, ka thënë se pret arritjen e një marrëveshjeje kur të takohet me liderin e Kinës, Xi Jinping, në Korenë e Jugut, midis një lufte tregtare disamujore me Pekinin.
“Shpresoj se ne do ta bëjmë një marrëveshje. Mendoj se do të kemi marrëveshje. Mendoj se do të jetë një marrëveshje e mirë për të dyja palët”, tha Trump më 29 tetor, një ditë para takimit të planifikuar me Xinë në kuadër të samitit të Bashkëpunimit Ekonomik të Azi-Paqësorit (APEC).
Takimi ballë për ballë i 30 tetorit - i pari mes dy liderëve që nga viti 2019 - ka në qendër përpjekjet për ta zbutur luftën e ashpër tregtare, pasi të dyja palët që kanë dhënë sinjale pozitive në prag të bisedimeve.

NESËR MOT I NDRYSHUESHËM

Në Mal të Zi ka mbajtur mot me vranësira mesatare deri krejtësisht i vranët. Frynë erë e dobët deri mesatare kryesisht nga drejtimet jugore. Temperaturat e shënuara në orën 13: Tivar, Ulqin e Budvë 21, Podgoricë e H.Novi 20, Rozhajë 19, Beranë e Andrievicë 18, B.Pole 17, Cetinë e Plevle 16, Nikshiq, Kollashin e Shavnik 15, Plluzhinë e Guci 14 dhe në Zhablak 10 gradë.
Për nesër në mëngjes do të mbajë mot kryesisht i vranët, kurse gjatë ditës me periudha me diell dhe i ngrohtë. Do të fryjë erë e dobët deri e mesme nga drejtimet e jugut. Temperatura e mëngjesit prej 5 deri në 16, ndërsa më e larta e ditës nga 14 deri në 25 gradë.