[ M.M.Lj. ]

PESKOV

Kremlj osudio 'politizaciju' u Holivudu zbog dodjele Oskara filmu Navaljni

Kremlj je ocijenio kao pokušaj "politizacije" sedme umjetnosti dodjelu Oskara dokumentarnom filmu o ruskom opozicionaru Alekseju Navaljnom.

Oskar za najbolji dokumentarni film dodijeljen je filmu "Navaljni" koji govori o događajima vezanim za hapšenje čuvenog ruskog opozicionara.

Nagradu u pozorištu Dolbi u Los Anđelesu primila je supruga Navaljnog Julija Navaljna pošto je protivnik Kremlja u zatvoru u Rusiji.

Film koji je režirao Kanađanin Danijel Roher, opisuje politički uspon Alekseja Navaljnog, pokušaj ubistva koji je jedva preživio i njegovo trovanje koje je uslijedilo.

Kremlj je osudio Holivud da hoće da "politizuje" sedmu umjetnost.

Portparol Kremlja Dmitrij Peskov rekao je da iako nije video film pretpostavlja da postoji određeni element politizacije na tu temu.

"Samom Holivudu ne smeta ponekad da ide u politizaciju svojih djela", dodao je Peskov.

Supruga Navaljnog Julija Navaljna rekla je da sanja o danu kada će on biti oslobođen i kada će "Rusija biti oslobođena".

"Moj suprug je u zatvoru jer govori istinu. Moj suprug je u zatvoru jer brani demokratiju", rekla je Julija Navaljna.

Navaljni je uhapšen u januaru 2021. po povratku iz Njemačke, gdje se pet mjeseci oporavljao od trovanja nervnim agensom za koje optužuje Kremlj. Osuđen je na dvije i po godine zatvora zbog navodnog kršenja uslovne slobode dok je bio van Rusije.

U martu 2022. Navaljni je osuđen na devet godina zatvora, za prevaru i nepoštovanje suda, što on opisuje kao politički motivisan pokušaj ruskih vlasti da ga drže iza rešetaka što je duže moguće.