K. R.

Nurković: Šahovići – sjećanje koje obavezuje i opominje

Prije 101 godinu, u mirnodobno doba, nad bošnjačkim stanovništvom Šahovića počinjen je genocid koji je ostavio neizbrisiv trag u našoj istoriji, napisao je potpredsjednik Skupštine Crne Gore, Mirsad Nurković.

Kako navodi, u vremenu kada je trebalo da vlada mir, razorena su sela, ugašeni životi, a čitave porodice ostale su bez doma, bez imena i bez budućnosti.

"Taj zločin nije samo rana prošlosti, to je ožiljak koji i danas traje, jer nas podsjeća koliko duboko može pasti čovjek kad izgubi osjećaj za pravdu i čovječnost. Genocid u Šahovićima obavezuje nas da ne zaboravimo, da ne šutimo i da istinu ne skrivamo. Šutnja pred zlom nije neutralnost, već saučesništvo", ističe Nurković.

Generacije koje su počinile ovaj strašan zločin otišle su, ali njegova sjenka ostaje u kolektivnoj memoriji, ne kao nešto što bismo zaboravili, već kao ozbiljno upozorenje.

" Da, danas slušamo bol i šutnju onih koji su preživjeli, kao i šutnju društva koje je, kako ističu analize, prečesto biralo tišinu pred zlom i time mu poslužilo. Naša moralna i državna odgovornost jeste da čuvamo sjećanje na žrtve i da budemo glas onih koji su zauvijek utihnuli. Samo istina, pravda i iskreno suočavanje sa prošlošću mogu izgraditi temelje trajnog mira i povjerenja među narodima Crne Gore. Sjećanje na Šahoviće nije okrenuto prošlosti, već je put ka budućnosti, da se nikada, nikome i nigdje takvo zlo ne ponovi", napisao je Nurković.