D.B.

turnir u madridu

Bubljik se plasirao u osminu finala, Karbaljes gubio živce

Kazahstanski teniser Aleksandar Bubljik plasirao se u osminu finala Mastersa u Madridu, pobjedom nad Špancem Robertom Karbaljesom Baenom, rezultatom 2:1 (1:6, 6:2, 6:2).

Karbaljes Baena je rutinski riješio prvi set u svoju korist pred domaćim navijačima, pa se činilo da će rutinski do naredne runde u Madridu.

Ipak, Bubljik je proigrao kako samo on zna, počeo je sve da pogađa, a malo i da izluđuje rivala na terenu, što je moglo da bude i kobno po njega.

Naime, Aleksandar je osvojio poen nakon udarca kroz noge, što se Baeni nije svidjelo, pa je odlučio da dva puta zaredom gađa Bubljika, direktno iz servisa. Promašio je oba puta, a Kazahstanac je ovu priliku iskoristio da se ismije domaćem teniseru.

To je bio i posljednji gem na meču, Karbaljes Baena nije uspio da povrati živce, Bubljik je kompletirao preokret i plasirao se među 16 najboljih, gdje ga danas čeka okršaj sa Amerikancem Benom Šeltonom.