Л.В.

TIM EVA MORALESA

Suspendovane sudije u Boliviji poslije meča koji je trajao 132 minuta

Fudbalski savez Bolivije suspendovao je danas šest sudija nakon što su jednu utakmicu nacionalne lige produžili za čak 42 minuta.

Palmaflor je u ponedjeljak pobijedio Bluming sa 3:2, u meču koji je, uz jaku kišu, odigran u gradu Čapareu i koji je trajao 132 minuta.

Sudija Hulio Gutijeres je produžio utakmicu za 42 minuta zbog video pregleda drugog gola Palmaflora i tuče koja je uslijedila nakon dva crvena kartona dodijeljena igračima Bluminga.

Sudijska komisija Fudbalskog saveza Bolivije je dan nakon meča donijela odluku o suspenziji sudija.

Fudbalski klub Bluming se oglasio na Tviteru i naveo da su sudije dovele igrače tog tima u veliki rizik od povreda zbog "previše dodatnog vremena".

Jedan od direktora Palmaflora je bivši predsjednik Bolivije Evo Morales, koji je na društvenim mrežama napisao da je njegov tim pobijedio uprkos "sumnjivim sudijama".

Morales je bio predsjednik Bolivije od 2006. do 2019. godine. Palmaflor je ove godine ušao u prvu ligu.